நாட்டிற்கு பொருட்களை இறக்குமதி செய்வதாகக் கூறி சட்டவிரோதமான முறையில் 190 பில்லியன் ரூபா பணத்தை வெளிநாடுகளுக்கு அனுப்பிய சம்பவம் தொடர்பில் ஜிப்ரி மொஹமட் உள்ளிட்ட சந்தேகநபர்கள் இருவரை எதிர்வரும் 12 ஆம் திகதி வரை விளக்கமறியலில் வைக்குமாறு கொழும்பு பிரதான நீதவான் அசங்க எஸ். போதரகம இன்று (05) உத்தரவிட்டார்.
வழக்கு விசாரணைக்கு எடுத்துக்கொள்ளப்பட்ட போது, சிறைச்சாலை அதிகாரிகளினால் வழக்கின் முதலாவது மற்றும் எட்டாவது சந்தேகநபர்கள் நீதிமன்றில் ஆஜர்படுத்தப்பட்டனர். இதன்போது, இந்த இரண்டு சந்தேகநபர்களுக்கும் பிணை வழங்குவதற்கு எதிரான ஆட்சேபனைகள் இன்று (05) தாக்கல் செய்யப்பட்டதாக நிதி குற்றப் புலனாய்வுப் பிரிவின் அதிகாரிகள் தெரிவித்தனர்.
முக்கிய விடயங்கள்- 190 பில்லியன் ரூபா பணத்தை சட்டவிரோதமாக வெளிநாடுகளுக்கு அனுப்பியதாக குற்றஞ்சாட்டப்பட்டுள்ளது.
- ஜிப்ரி மொஹமட் உள்ளிட்ட முதலாவது மற்றும் எட்டாவது சந்தேகநபர்கள் எதிர்வரும் 12 ஆம் திகதி வரை விளக்கமறியலில் வைக்கப்பட்டுள்ளனர்.
- சந்தேகநபர்களுக்கு பிணை வழங்குவதற்கு நிதி குற்றப் புலனாய்வுப் பிரிவு எதிர்ப்புத் தெரிவித்தது.
- பிணை தொடர்பான உத்தரவு எதிர்வரும் 12 ஆம் திகதி அறிவிக்கப்படவுள்ளது.
விசாரணைகள் தொடர்கின்றன
இறக்குமதி மற்றும் ஏற்றுமதி நடவடிக்கைகள் தொடர்பான விசாரணைகளின் இறுதி மதிப்பீட்டு அறிக்கைகள் மற்றும் ஏனைய ஆவணங்களை நீதிமன்றத்தில் சமர்ப்பிக்க எதிர்பார்ப்பதாக விசாரணை அதிகாரிகள் இதன்போது தெரிவித்தனர்.
குறித்த நிறுவனங்களை ஸ்தாபிப்பதற்கும் அவற்றின் பின்னணியை உருவாக்குவதற்கும் பங்களித்தவர்களிடம் வாக்குமூலங்களைப் பெற்று சமர்ப்பிக்கவுள்ளதாகவும், ஜிப்ரி மொஹமட் மற்றும் எட்டாவது சந்தேகநபர் தொடர்பில் மேலதிக தகவல்கள் திரட்டப்பட்டு வருவதாகவும் அதிகாரிகள் கூறினர். அத்துடன், வங்கி அதிகாரிகளுக்கும் குறித்த நிறுவனங்களுக்கும் இடையில் ஏதேனும் தொடர்புகள் காணப்படுகின்றதா என்பதை ஆராய்வதற்குரிய வாக்குமூலங்களும் நீதிமன்றத்தில் ஒப்படைக்கப்படவுள்ளன.
அடுத்து என்ன?
முன்வைக்கப்பட்ட விடயங்களை பரிசீலித்த நீதவான், சந்தேகநபர்கள் தொடர்பான பிணை உத்தரவு எதிர்வரும் 12 ஆம் திகதி அறிவிக்கப்படும் என அறிவித்தார்.
இதையும் படியுங்கள்- கைது செய்யப்பட்ட மீன்பிடிப் படகில் இருந்து 3 பில்லியன் ரூபா பெறுமதியான ஹெரோயின் மற்றும் ஐஸ் மீட்பு
- இரண்டாவது திருமணமும் கைகூடாத நிலையில் முன்னாள் காதலியை வீட்டிலேயே கொன்று காதலனும் தூக்கிட்டு தற்கொலை
- உயிர்த்த ஞாயிறு தாக்குதல் சலேயின் வழிநடத்தலில் மேலும் மூவரின் அறிவோடு இடம்பெற்றதாக சிஐடி தெரிவிப்பு
