இலங்கை கடற்படையினால் முன்னெடுக்கப்பட்டு வரும் வணிகக் கப்பல் பாதுகாப்புக் குழுக்களின் (OBST) செயற்பாடுகளின் தற்போதைய நிலைமை மற்றும் நிதிசார் அடைவுகள் குறித்து மீளாய்வு செய்யும் விசேட சந்திப்பொன்று பாராளுமன்ற கட்டடத் தொகுதியில் இடம்பெற்றுள்ளது. இந்த கலந்துரையாடல் ஓய்வுபெற்ற மேஜர் ஜெனரல் அருண ஜயசேகர தலைமையில் நடைபெற்றது.
பெட்டிகலவத்தை ஆயுதக் களஞ்சியசாலையின் நிலைமை
பாதுகாப்பு பிரதி அமைச்சர் காலி, பெட்டிகலவத்தை ஆயுதக் களஞ்சியத் தொகுதியில் மேற்கொண்ட கண்காணிப்பு விஜயத்தின் போது கண்டறியப்பட்ட விடயங்கள் குறித்து இங்கு அதிக கவனம் செலுத்தப்பட்டது. வணிகக் கப்பல்களின் பாதுகாப்புக்காக இலங்கை கடற்படையின் பங்களிப்புடன் செயற்படும் வெளிநாட்டு தனியார் கடல்சார் பாதுகாப்பு நிறுவனங்களுக்குச் (PMSCs) சொந்தமான ஆயுதங்கள் மற்றும் உபகரணங்கள் இந்த இடத்திலேயே களஞ்சியப்படுத்தப்படுகின்றன.
அந்தக் கண்காணிப்பின் போது தெரியவந்த பிரச்சினைகளுக்கான தீர்வுகள், செயற்பாடுகள் மற்றும் நிதிசார் நடவடிக்கைகளின் முன்னேற்றம், அத்துடன் இதன் மூலம் நாட்டிற்கு கிடைக்கும் வருமானத்தை மேலும் அதிகரிப்பதற்கான வழிகள் குறித்தும் இங்கு விரிவாக கலந்துரையாடப்பட்டுள்ளது.
வெளிப்படைத்தன்மையும் பொறுப்புக்கூறலும்
இந்த செயற்பாடுகளைத் தடையின்றியும், முறையாகவும், வினைத்திறனாகவும் முன்னெடுப்பதை உறுதி செய்ய சம்பந்தப்பட்ட அதிகாரிகளுக்கு தேவையான ஆலோசனைகள் வழங்கப்பட்டுள்ளன. சரியான செயல்பாட்டு மற்றும் நிதி முகாமைத்துவத்தின் மூலம் எதிர்பார்க்கப்படும் பெறுபேறுகளைப் பெறுவதற்கு வெளிப்படைத்தன்மையையும் பொறுப்புக்கூறலையும் உச்சளவில் பேண வேண்டியதன் முக்கியத்துவத்தை பிரதி அமைச்சர் வலியுறுத்தியுள்ளதாக தெரிவிக்கப்படுகிறது.
