பைரேட்ஸ் திரைப்படத் தொடரை முறையாக நிறைவு செய்வதற்கு உரிய சூழல் அமையும் பட்சத்தில், ஜெக் ஸ்பேரோ கதாபாத்திரத்தில் மீண்டும் நடிக்க பரிசீலிப்பதாக என்டர்டெயின்மென்ட் டுடே ஊடகத்துடனான உரையாடலில் ஜோனி டெப் தெரிவித்துள்ளார்.
தயாரிப்பாளர் ஜெர்ரி ப்ரூக்ஹைமருடன் தமக்குள்ள நெருங்கிய தனிப்பட்ட நட்புறவைக் குறிப்பிட்ட அவர், அவருடன் இணைந்து எந்தவொரு புதிய திட்டத்திலும் பணியாற்றத் தயாராக இருப்பதாகவும் வலியுறுத்தினார்.
முக்கிய விடயங்கள்- இத்தொடரை சிறந்த முறையில் நிறைவு செய்வதற்கு விடயங்கள் சரியாக முன்னெடுக்கப்பட்டால் மீண்டும் நடிக்க ஜோனி டெப் தயார்.
- டி23 நிகழ்வில் பேசிய தயாரிப்பாளர் ஜெர்ரி ப்ரூக்ஹைமர், திரைக்கதைப் பணிகள் மற்றும் டெப்புடனான பேச்சுவார்த்தைகள் இடம்பெற்று வருவதை உறுதிப்படுத்தினார்.
- உலகளவில் 4.5 பில்லியன் அமெரிக்க டொலர்களுக்கும் மேல் வசூலித்த ஐந்து படங்களில் ஏற்கனவே கெப்டன் ஜெக் ஸ்பேரோவாக டெப் நடித்துள்ளார்.
திரைக்கதை தயாரிப்புப் பணிகள் ஏற்கனவே ஆரம்பம்
முன்னதாக, டி23 நிகழ்வில் உரையாற்றிய ஜெர்ரி ப்ரூக்ஹைமர், டெப்புடன் பேச்சுவார்த்தைகள் முன்னெடுக்கப்பட்டு வருவதாகவும் திரைக்கதை ஒன்று தயாரிக்கப்பட்டு வருவதாகவும் குறிப்பிட்டிருந்தார்.
இயன் மெக்கெல்லன், ரூபர்ட் கிரிண்ட் மற்றும் ஆண்ட்ரியா ரைஸ்பரோ ஆகியோருடன் இணைந்து நடித்துள்ள தனது எபனேசர் திரைப்படத்தின் நவம்பர் 13 வெளியீட்டை முன்னிட்டு தற்போது விளம்பரப் பணிகளில் ஈடுபட்டுள்ள டெப், இதற்கு முன்னர் இந்த விசித்திரமான கடற்கொள்ளையர் கதாபாத்திரத்திற்காக அகாடமி விருதுக்கான பரிந்துரையையும் பெற்றிருந்தார்.
2003 ஆம் ஆண்டின் த கேர்ஸ் ஒப் த பிளாக் பேர்ல் முதல் 2017 ஆம் ஆண்டின் டெட் மென் டெல் நோ டேல்ஸ் வரையான ஐந்து திரைப்படத் தொடர்கள், உலகளாவிய ரீதியில் 4.5 பில்லியன் அமெரிக்க டொலர்களுக்கும் அதிகமான வசூலைப் பெற்றுள்ளன. இதில் டெட் மேன்ஸ் செஸ்ட் மற்றும் ஒன் ஸ்ட்ரேஞ்சர் டைட்ஸ் ஆகிய படங்கள் ஒவ்வொன்றும் 1 பில்லியன் அமெரிக்க டொலர்களைத் தாண்டின.
"பைரேட்ஸ் திரைப்படத் தொடரை எவ்வாறு நிறைவு செய்வது என்பது குறித்த விடயங்கள் மிகச் சரியாக அமைந்தால், உண்மையாகவே நான் விரும்பும் ஒரே பங்களிப்பு, அதற்கு ஒரு சிறந்த வழியனுப்புதலை வழங்குவது மட்டுமே."
