காதலைத் தேடும் தனிநபர்களுக்கு பின்லாந்திலிருந்து இலவச சுற்றுப்பயணம்

உலகின் மிகவும் மகிழ்ச்சியான நாடாக அறியப்படும் பின்லாந்தின் சுற்றுலா சபை, உலகெங்கிலும் உள்ள தனிநபர்களுக்காக Finnish Dinner Date என்ற பெயரில் புதிய திட்டம் ஒன்றை ஆரம்பித்துள்ளது. இந்த திட்டத்தின் மூலம் தெரிவு செய்யப்படும் 16 பேருக்கு விமானப் பயணம், தங்குமிடம், உணவு மற்றும் பல்வேறு செயற்பாடுகள் உள்ளிட்ட அனைத்து செலவுகளுடனும் பின்லாந்துக்கு இலவசமாக செல்வதற்கான வாய்ப்பு வழங்கப்படவுள்ளது.

இந்த விசேட பயணம் 2027 பெப்ரவரி 09 முதல் 19 வரை நடைபெறவுள்ளதுடன், ஹெல்சிங்கி (Helsinki) மற்றும் தம்பரே (Tampere) ஆகிய நகரங்களில் நடைபெறும் இரவு விருந்துபசாரங்கள் இதன் முக்கிய அம்சமாகும். இதில் வெளிநாட்டுப் பங்கேற்பாளர்கள் பின்லாந்தின் தனிநபர்களைச் சந்திக்கவும், முன்னணி சமையல் கலைஞர்கள் தயாரிக்கும் மீன், பெர்ரி வகைகள் மற்றும் காளான் போன்ற உள்நாட்டு உணவுகளை சுவைக்கவும் வாய்ப்பு கிடைக்கும்.

முக்கிய விடயங்கள்

• தெரிவு செய்யப்படும் 16 தனிநபர்களுக்கு அனைத்து செலவுகளுடனான இலவச பயணம் வழங்கப்படும்.
• இந்த பயணம் 2027 பெப்ரவரி 09 முதல் 19 வரையான காலப்பகுதியில் நடைபெறவுள்ளது.
• பின்லாந்தில் வசிக்காத, 18 வயதுக்கு மேற்பட்ட எந்தவொரு நாட்டையும் சேர்ந்த தனிநபர்களும் விண்ணப்பிக்கலாம்.

விண்ணப்பிக்கக் கூடியவர்கள் யார்?

பின்லாந்தில் வசிக்காத, உலகின் எந்தவொரு நாட்டிலும் வாழும் 18 வயது பூர்த்தியடைந்த தனிநபர்கள் இதற்கு விண்ணப்பிக்க முடியும். அந்நாட்டின் பல்பொருள் அங்காடிகளில் உள்ள இளஞ்சிவப்பு நிற Sinkkukori எனப்படும் தனிநபர்களுக்கான கூடைகளைப் பயன்படுத்தி துணையைத் தேடும் முறையை அடிப்படையாகக் கொண்டு இந்த நிகழ்ச்சித் திட்டம் உருவாக்கப்பட்டுள்ளது.

விண்ணப்பிப்பது எப்படி?

இரவு விருந்தொன்றிற்கு நீங்கள் எதனை வழங்குவீர்கள், அதற்கான காரணம் என்ன என்ற கேள்விக்குப் பதிலளிக்கும் வகையில் ஆங்கிலத்தில் குறுகிய காணொளி ஒன்றை தயாரிக்க வேண்டும். அந்தக் காணொளியை TikTok, Instagram அல்லது YouTube ஊடாக பதிவேற்றி, VisitFinland உத்தியோகபூர்வ இணையத்தளத்தில் விண்ணப்பத்தை பூர்த்தி செய்து அதன் இணைப்பை உள்ளிட முடியும் என தெரிவிக்கப்பட்டுள்ளது.

விண்ணப்பங்கள் ஏற்றுக்கொள்ளப்படும் இறுதி திகதி 2026 நவம்பர் 10 ஆம் திகதி பின்லாந்து நேரப்படி முற்பகல் 11:59 வரையாகும்.

அடுத்து என்ன?

தெரிவு செய்யப்படும் அதிர்ஷ்டசாலிகளான 16 பேரின் விபரங்கள் 2026 டிசம்பர் 1 ஆம் திகதி Visit Finland உத்தியோகபூர்வ சமூக ஊடக பக்கங்கள் ஊடாக வெளியிடப்படவுள்ளன.