තනිකඩ අයට ෆින්ලන්තයෙන් නොමිලේ සංචාරයක්

ලෝකයේ සතුටුම රට ලෙස ප්‍රකට ෆින්ලන්තයේ සංචාරක මණ්ඩලය විසින් ලොව පුරා තනිකඩයින් වෙනුවෙන් Finnish Dinner Date නමින් නව ව්‍යාපෘතියක් ආරම්භ කර ඇත. මෙම වැඩසටහන හරහා තෝරාගනු ලබන 16 දෙනෙකුට ගුවන් ගමන්, නවාතැන්, ආහාර සහ විවිධ ක්‍රියාකාරකම් ඇතුළු සියලු වියදම් සහිතව නොමිලේ ෆින්ලන්තයට පැමිණීමට අවස්ථාව සැලසේ.

මෙම විශේෂිත සංචාරය 2027 පෙබරවාරි 09 සිට 19 දක්වා පැවැත්වීමට නියමිත අතර හෙල්සින්කි (Helsinki) සහ ටැම්පරේ (Tampere) නගරවලදී පැවැත්වෙන රාත්‍රී භෝජන සංග්‍රහ මෙහි ප්‍රධාන අංගයකි. එහිදී විදේශීය සහභාගීවන්නන්ට ෆින්ලන්තයේ තනිකඩයින් හමුවීමට මෙන්ම ප්‍රමුඛ පෙළේ කෝකිවරුන් සදන මාළු, බෙරි වර්ග සහ හතු වැනි දේශීය ආහාර රසවිඳීමටද හැකි වේ.

අයැදුම් කළ හැක්කේ කාටද?

ෆින්ලන්තයේ පදිංචි නොවන, ලොව ඕනෑම රටක වෙසෙන වයස අවුරුදු 18 සම්පූර්ණ වූ තනිකඩ පුද්ගලයින්ට මේ සඳහා තනිවම අයැදුම් කළ හැකිය. එරට සුපිරි වෙළෙඳසැල්වල ඇති රෝස පැහැති Sinkkukori නම් තනිකඩ කූඩ භාවිත කරමින් පෙම්වතුන් සෙවීමේ ක්‍රමවේදය ආශ්‍රයෙන් මෙම වැඩසටහන නිර්මාණය කර තිබේ.

අයැදුම්පත් යොමු කරන ආකාරය

රාත්‍රී භෝජන සංග්‍රහයකට තමන් පිරිනමන්නේ කුමක්ද සහ ඒ ඇයිද යන ප්‍රශ්නයට පිළිතුරු දෙමින් ඉංග්‍රීසි බසින් කෙටි වීඩියෝවක් සකස් කළ යුතුය. එම වීඩියෝව TikTok, Instagram හෝ YouTube හරහා පළ කර, VisitFinland නිල වෙබ් අඩවියෙන් අයැදුම්පත පුරවා එහි ලින්ක් එක ඇතුළත් කළ හැකි බව සඳහන් වේ.

අයැදුම්පත් භාරගන්නා අවසන් දිනය වන්නේ 2026 නොවැම්බර් 10 වැනිදා ෆින්ලන්ත වේලාවෙන් පෙ.ව. 11:59 දක්වාය.