எரிபொருள் மானியத்தை அனைத்து நுகர்வோருக்கும் ஒரே மாதிரியாக வழங்குவதற்குப் பதிலாக, உண்மையில் தேவைகளுடைய மக்கள் மற்றும் பொதுப் போக்குவரத்துத் துறையை மாத்திரம் இலக்காகக் கொண்டு வழங்குவதன் முக்கியத்துவம் குறித்து அரசாங்க நிதி பற்றிய தெரிவுக்குழுவில் வலியுறுத்தப்பட்டுள்ளது. அதன் தலைவர் பாராளுமன்ற உறுப்பினர் கலாநிதி ஹர்ஷ டி சில்வா தலைமையில் பாராளுமன்றத்தில் கூடியபோதே இவ்விடயங்கள் கலந்துரையாடப்பட்டதாக தெரிவிக்கப்படுகிறது.

இக்கூட்டத்தில் பிரதி அமைச்சர் சதுரங்க அபேசிங்க உட்பட ரவி கருணாநாயக்க, ஹர்ஷண ராஜகருணா, சாணக்கியன் ராஜபுத்திரன் ராசமாணிக்கம், எம். கே. எம். அஸ்லம், நிமல் பலிஹேன, விஜேசிறி பஸ்நாயக்க, திலின சமரக்கோன், அஜித் அகலகட மற்றும் சுனில் ராஜபக்ஷ ஆகிய பாராளுமன்ற உறுப்பினர்கள் கலந்துகொண்டனர்.

முக்கிய விடயங்கள்

  • எரிபொருள் மானியத்தை மிகவும் தேவையுள்ள மக்களுக்கும் பொதுப் போக்குவரத்துக்கும் மாத்திரம் வழங்குமாறு யோசனை முன்வைக்கப்பட்டுள்ளது.
  • டயர் இறக்குமதிக்கு புதிய தரக்கட்டுப்பாடுகளை விதிப்பதும், அதற்காக வழங்கப்பட்ட 3 மாத கால அவகாசம் போதாது என்பது குறித்தும் கவனம் செலுத்தப்பட்டுள்ளது.
  • அஸ்வெசும பயனாளிக் குடும்பங்களுக்கு மேலதிக கொடுப்பனவு மற்றும் டீசல் மானியம் தொடர்பாகவும் கலந்துரையாடப்பட்டுள்ளது.

எரிபொருள் விலைச்சூத்திரம் மற்றும் சந்தைப் பிரச்சினைகள்

மத்திய கிழக்கு போர்ச் சூழலினால் பாதிக்கப்பட்ட மக்களுக்கு நிவாரணம் வழங்கும் வேலைத்திட்டத்தின் கீழ் டீசல் எரிபொருள் மானியம் மற்றும் அஸ்வெசும பயனாளிகளுக்கு மேலதிக கொடுப்பனவு வழங்குவது குறித்தும் இங்கு கவனம் செலுத்தப்பட்டது. இலங்கை பெற்றோலியக் கூட்டுத்தாபனம் (CPC) சுத்திகரிப்பு நிலையம் மூலம் ஒரு பகுதியை உற்பத்தி செய்கின்ற போதிலும், தனியார் நிறுவனங்கள் முழுமையாக எரிபொருளை இறக்குமதி செய்வதால் செலவு மற்றும் போட்டித்தன்மையில் சமநிலையின்மை காணப்படுவதாக விளக்கமளிக்கப்பட்டது.

வெளிநாட்டு நிறுவனங்களுக்கும் CPC நிறுவனத்துக்கும் இடையில் இறக்குமதி செலவில் இடைவெளி காணப்பட்டாலும், CPC அறிவிக்கும் விலையிலேயே ஏனைய நிறுவனங்களும் விலையைத் தீர்மானிக்க வேண்டியுள்ளதாக குழு கண்டறிந்துள்ளது. இங்கு சுயாதீன ஒழுங்குபடுத்தல் ஒன்றின் அவசியமும் சுட்டிக்காட்டப்பட்டுள்ளது.

டயர் தரம் மற்றும் அஸ்வெசும திருத்தங்கள்

வாகன டயர்களை இறக்குமதி செய்வதற்கு புதிய தரக்கட்டுப்பாடுகளை அறிமுகப்படுத்துவதில் ஏற்பட்டுள்ள பிரச்சினைகள் குறித்தும் அதிகாரிகளிடம் வினவப்பட்டது. இறக்குமதியாளர்களுக்கு வழங்கப்பட்ட 3 மாத காலம் போதுமானதாக இல்லாமை, பரிசோதனை வசதிகள் மட்டுப்படுத்தப்பட்டிருத்தல் மற்றும் உள்நாட்டு உற்பத்தியாளர்களுக்கு நியாயமற்ற அனுகூலம் கிடைத்து நுகர்வோர் அசௌகரியத்திற்கு உள்ளாவார்களா என பாராளுமன்ற உறுப்பினர்கள் கேள்வியெழுப்பினர்.

இதற்கு மேலதிகமாக, அஸ்வெசும பயனாளிகளைத் தெரிவு செய்வதற்கான 22 அளவுகோல்கள் மற்றும் தரவு சரிபார்ப்பு செயல்முறை குறித்தும் ஆராய்ந்த தெரிவுக்குழு, உண்மையான தகுதியுடையவர்கள் விடுபடுவதையும் தகுதியற்றவர்கள் உள்வாங்கப்படுவதையும் தடுப்பதன் அவசியத்தை சுட்டிக்காட்டியது.