துருக்கியின் இஸ்மீர் (Izmir) துறைமுக நகருக்கு அண்மித்த பகுதியில் அமைந்துள்ள பிரபல இரும்பு மற்றும் எஃகு உற்பத்தித் தொழிற்சாலையொன்றில் திடீர் வெடிவிபத்து ஏற்பட்டுள்ளது. இந்த அனர்த்தத்தில் சிக்கி 17 பேர் சம்பவ இடத்திலேயே உயிரிழந்துள்ளதுடன், மேலும் 12 பேர் காயமடைந்துள்ளனர்.
பராமரிப்புப் பணிகளின் போது ஏற்பட்ட விபத்து
துருக்கியின் முன்னணி எஃகு உற்பத்தி நிறுவனங்களில் ஒன்றான அலியாகா (Aliaga) பகுதியில் அமைந்துள்ள 'ஹபாஸ் டிமிர் செலிக்' (Habas Demir Celik) தொழிற்சாலையிலேயே இந்த விபத்து நேர்ந்துள்ளது. அங்குள்ள மின்சார வில் உலை (electric arc furnace) ஒன்றில் பராமரிப்புப் பணிகள் முன்னெடுக்கப்பட்டுக் கொண்டிருந்த போதே இந்த வெடிப்புச் சம்பவம் இடம்பெற்றுள்ளதாக தெரிவிக்கப்படுகிறது.
இந்த துரதிர்ஷ்டவசமான சம்பவத்தில் உயிரிழந்த மற்றும் காயமடைந்த அனைவரும் குறித்த தொழிற்சாலையில் பணியாற்றி வந்த தொழிலாளர்கள் என குறிப்பிடப்பட்டுள்ளது.
