අනුරාධපුර ඓතිහාසික රුවන්වැලි මහා සෑය අභියස අද (12) පෙරවරුවේ දැඩි නොසන්සුන්කාරී තත්ත්වයක් සහ ගැටුමක් හටගත්තේය. යෝජිත අනුරාධපුර පූජා නගර සංවර්ධන සැලැස්මට එරෙහිව මාරාන්තික උපවාසයක නිරත වෙමින් සිටි පිරිසක් සහ පිටතින් පැමිණි තවත් පිරිසක් අතර මෙම ගැටුම නිර්මාණය වී තිබිණි.
යෝජිත සංවර්ධන ගැසට් පත්‍රය ඉල්ලා අස්කරගන්නා ලෙසත්, පූජ්‍ය ගලගොඩඅත්තේ ඥානසාර හිමියන් නිදහස් කරන ලෙසත් බලකරමින් පූජ්‍ය බලංගොඩ කස්සප හිමියන් ඇතුළු භික්ෂූන් වහන්සේලා තිදෙනකු ආරම්භ කළ මාරාන්තික උපවාසය අද වන විට ක්‍රියාත්මක වූයේ දෙවැනි දිනටයි. ඊට සමගාමීව දින කිහිපයක සිට විරෝධතාකරුවෝ එම සත්‍යග්‍රහ භූමියේ රැඳී සිටියහ.
මෙම උණුසුම් තත්ත්වය හටගත්තේ රාජාංගනයේ සද්ධාරතන නමැති හිමි ඇතුළු ගිහි පිරිසක් සත්‍යග්‍රහ භූමියට පැමිණීමත් සමඟය. ඇතැම් වාර්තා වලින් කියැවුනේ පොලු රැගත් ගිහි පිරිසක් ද ඒ සමඟ පැමිණ ඇති බවකි. පැමිණි පිරිස සහ උපවාස භූමියේ රැඳී සිටි පිරිස අතර මුලින්ම දැඩි බහින්බස් වීමක් හටගෙන ඇති අතර, එය කෙටි වේලාවකින් ගුටි බැට හුවමාරුවක් දක්වා වර්ධනය විය.
එහිදී කස්සප හිමි ඇතුළු උපවාස භූමියේ රැඳී සිටි පිරිස විසින් එල්ල කළ ප්‍රහාරයකින් රාජාංගනයේ සද්ධාරතනගේ හිස පැලී දැඩි ලෙස ලේ ගලන තත්ත්වයක් නිර්මාණය විය. දෙපාර්ශ්වය අතර ඇතිවූ මෙම රළු ගැටුමත් සමඟ පූජා භූමියේ සාමකාමී බව මුළුමනින්ම බිඳ වැටී තිබුණි. ඉතාම අශෝභන ලෙස සිවුරු හැඳගත් අය ගහගන්නා දර්ශනද බෞද්ධයන්ගේ කම්පාවට හේතු කරවීය.
වහාම ක්‍රියාත්මක වූ පොලිසිය ඇතුළු ආරක්ෂක අංශ මැදිහත් වී වාතාවරණය පාලනය කිරීමට පියවර ගත් අතර, මේ වන විට එම ස්ථානයට පොලිස් ආරක්ෂාව ද යොදවා ඇත. මෙම විරෝධතාව පැවැත්වෙන ස්ථානය සම්බන්ධයෙන් මීට පෙර අධිකරණ නියෝග ද නිකුත් කර තිබූ පසුබිමක මෙම තත්ත්වය හටගැනීම විශේෂත්වයකි.
ගැටුමට මුල් වූ නිශ්චිත සිදුවීම් පෙළ පිළිබඳව තවදුරටත් තොරතුරු තහවුරු වෙමින් පවතින අතර, පූජා නගර සංවර්ධන සැලැස්මට එරෙහිව ඇරඹි විරෝධතාව අවසානයේ පුදබිමක් අභියස ලේ වැගිරීමකින් සහ දැඩි නොසන්සුන්තාවකින් යුතුව ආරක්ෂක අංශ මැදිහත් වන තත්ත්වයකට පත්ව තිබේ.
