கொழும்பு முழுவதும் வடிகால் வழிகள் அடைபட்டு பாதிப்புகளை ஏற்படுத்தும் 60 சிக்கலான பகுதிகளை அதிகாரிகள் அடையாளம் கண்டுள்ளனர். நகரில் அடிக்கடி ஏற்படும் வெள்ளப் பெருக்கைக் கட்டுப்படுத்துவதற்காக, பல அரச நிறுவனங்கள் இணைந்து இந்தத் தடைகளை அகற்றும் நடவடிக்கையில் தற்போது இறங்கியுள்ளன.
கொழும்பு மாநகர சபைக்குட்பட்ட வடக்கு கொழும்பு, கிழக்கு கொழும்பு, மேற்கு கொழும்பு, பொரளை மற்றும் மத்திய கொழும்பு ஆகிய ஐந்து தேர்தல் தொகுதிகளில் இந்த இடங்கள் பரந்து காணப்படுகின்றன.
முக்கிய விடயங்கள்
- அடையாளம் காணப்பட்ட பகுதிகள் கொழும்பு மாநகர சபை எல்லைக்குட்பட்ட ஐந்து தேர்தல் தொகுதிகளில் அமைந்துள்ளன.
- கடுமையான அடைப்புகள் மற்றும் அதிக ஆபத்துள்ள பகுதிகளுக்கு முன்னுரிமை அளித்து, துப்புரவுப் பணிகள் இன்று (08) ஆரம்பிக்கப்பட்டன.
- இலங்கை இராணுவம் உட்பட பல அரச நிறுவனங்கள் இந்த கூட்டுத் துப்புரவு நடவடிக்கையில் கைகோர்த்துள்ளன.
முக்கிய இடங்களில் ஆரம்பமான துப்புரவுப் பணிகள்
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் கூற்றுப்படி, துப்புரவுப் பணிகள் இன்று (08) ஆரம்பிக்கப்பட்டுள்ளன. பாரிய வடிகால் அடைப்புகள் மற்றும் கடுமையான வெள்ள அபாயத்தை எதிர்நோக்கும் பகுதிகளுக்கு உடனடி கவனம் செலுத்தப்பட்டு வருகின்றது.
அடையாளம் காணப்பட்ட பல முக்கிய இடங்களில் கள ஆய்வுகளும் வடிகான் துப்புரவுப் பணிகளும் ஏற்கனவே முன்னெடுக்கப்பட்டு வருகின்றன. நாராஹேன்பிட்ட கிரிமண்டல மாவத்தை, பம்பலப்பிட்டி ஹேக் வீதி, கொலிங்வுட் பிளேஸ், குரே நகர வீடமைப்புத் திட்டம், ஸ்டாஃபோர்ட் வீதி மற்றும் அதனையொட்டிய கிருலப்பனை கால்வாய், மத்திய கொழும்பில் உள்ள நியூ பஜார், டி மெல் வீதி மற்றும் பரடைஸ் வீதி ஆகிய பகுதிகளில் தற்போது பணிகள் இடம்பெற்று வருகின்றன.
கொழும்பு தொடர்ந்து நீரில் மூழ்குவதற்கான காரணங்கள்
வெள்ளிக்கிழமை மாலை (06) பெய்த பலத்த மழையினால் புறக்கோட்டை, தெமட்டகொட, ஒருகொடவத்தை, கொள்ளுப்பிட்டி, பம்பலப்பிட்டி மற்றும் கொம்பனித்தெரு ஆகிய பகுதிகள் நீரில் மூழ்கியதைத் தொடர்ந்து இந்த அவசர நடவடிக்கை எடுக்கப்பட்டுள்ளது.
பல வருடங்களாகப் பராமரிக்கப்படாத வடிகால் அமைப்புகள், சட்டவிரோதக் கட்டுமானங்கள், திட்டமிடப்படாத நகரமயமாக்கல் மற்றும் அரச நிறுவனங்களுக்கு இடையிலான ஒருங்கிணைப்பின்மை ஆகியவையே இந்த தொடர் வெள்ளத்திற்கு முக்கியக் காரணங்கள் என்று அதிகாரிகள் சுட்டிக்காட்டியுள்ளனர்.
தற்காலிகமாக அடைப்புகளை அகற்றுவதோடு நின்றுவிடாமல், நீண்ட கால அடிப்படையில் நகரத்தைப் பாதுகாப்பதற்கான நிலையான தீர்வுகளை எட்டுவதே இத்திட்டத்தின் நோக்கமாகும் என்று அதிகாரிகள் தெரிவித்துள்ளனர். இலங்கை இராணுவம், கொழும்பு மாநகர சபை, இலங்கை காணி அபிவிருத்திக் கூட்டுத்தாபனம், நகர அபிவிருத்தி அதிகார சபை மற்றும் வீதி அபிவிருத்தி அதிகார சபை ஆகியவற்றின் குழுக்கள் இந்த கூட்டு நடவடிக்கையில் ஈடுபட்டு வருகின்றன.
