நாடு முழுவதும் பெய்து வரும் பலத்த மழையைத் தொடர்ந்து, தேசிய கட்டிட ஆராய்ச்சி நிறுவனம் (NBRO) மண்சரிவு அபாய எச்சரிக்கைகளை விடுத்துள்ளது. இதன்படி, எட்டு மாவட்டங்களிலுள்ள பல பிரதேச செயலகப் பிரிவுகளுக்கு முதலாம் மற்றும் இரண்டாம் கட்ட மண்சரிவு முன் எச்சரிக்கைகள் பிறப்பிக்கப்பட்டுள்ளன.
இரண்டாம் கட்ட எச்சரிக்கையின் கீழ், நுவரெலியா மாவட்டத்தின் நில்தண்டாஹின்ன மற்றும் வலப்பனை ஆகிய பிரிவுகளிலும், கண்டி மாவட்டத்தின் உடுதும்பர பிரிவிலும் வாழும் மக்கள் மிகுந்த அவதானத்துடனும் எச்சரிக்கையுடனும் இருக்குமாறு கேட்டுக்கொள்ளப்பட்டுள்ளனர்.
பல மாகாணங்களில் முதலாம் கட்ட எச்சரிக்கை
பதுளை மாவட்டத்தின் மீகஹகிவுல மற்றும் காலி மாவட்டத்தின் தவலம, நாகொட ஆகிய பகுதிகளுக்கு முதலாம் கட்ட எச்சரிக்கை விடுக்கப்பட்டுள்ளது.
அதேபோல் நுவரெலியா மாவட்டத்தின் மாத்துரட்ட, கொத்மலை மேற்கு, கொத்மலை கிழக்கு மற்றும் ஹங்குரன்கெத்த ஆகிய பகுதிகளுக்கும், மாத்தறை மாவட்டத்தின் பஸ்கொட, மொணராகலை மாவட்டத்தின் வெல்லவாய மற்றும் கண்டி மாவட்டத்தின் தும்பனை, மினிப்பே ஆகிய பகுதிகளுக்கும் இந்த முதலாம் கட்ட எச்சரிக்கை விடுக்கப்பட்டுள்ளது.
கேகாலை மற்றும் இரத்தினபுரி மாவட்டங்களுக்கான எச்சரிக்கை
தேசிய கட்டிட ஆராய்ச்சி நிறுவனத்தின் தகவல்படி, கேகாலை மாவட்டத்தின் அரநாயக்க, யட்டியாந்தோட்டை, புலத்கொஹுபிட்டிய, மாவனெல்லை, ருவன்வெல்ல, கேகாலை மற்றும் வரகாப்பொல ஆகிய பகுதிகளுக்கு எச்சரிக்கைகள் விடுக்கப்பட்டுள்ளன.
இரத்தினபுரி மாவட்டத்தில் கொடகவெல, கொலொன்ன, வெளிகேபொல மற்றும் பலாங்கொடை ஆகிய பிரதேச செயலகப் பிரிவுகளுக்கு இந்த எச்சரிக்கை பொருந்தும் என அறிவிக்கப்பட்டுள்ளது.
அடுத்தகட்ட நடவடிக்கை
இந்த முன் எச்சரிக்கைகள் யாவும் நாளை (08) இரவு 8:00 மணி வரை அமுலில் இருக்கும் என தேசிய கட்டிட ஆராய்ச்சி நிறுவனம் தெரிவித்துள்ளது.
