பாராளுமன்றத்தில் முதலாம் வாசிப்பிற்காக சமர்ப்பிக்கப்பட்டுள்ள குடிவரவு சட்டமூலம் தொடர்பான விசேட கலந்துரையாடலொன்று கடந்த 18ஆம் திகதி பாராளுமன்றத்தில் நடைபெற்றது. பாராளுமன்ற உறுப்பினர் வைத்தியர் நஜித் இந்திக தலைமையில் நல்லாட்சி, நீதி மற்றும் சிவில் பாதுகாப்பு பற்றிய துறைசார் மேற்பார்வைக் குழு கூடிய போதே இக்கலந்துரையாடல் இடம்பெற்றது.
உயர் நீதிமன்றம் வழங்கிய தீர்மானத்திற்கு அமைய குழுநிலை விவாதத்தின் போது மேற்கொள்ளப்படும் திருத்தங்களுக்கு உட்பட்டு, இந்த புதிய சட்டமூலத்திற்கு குழுவின் அனுமதி வழங்கப்பட்டுள்ளதாக தெரிவிக்கப்படுகிறது. இந்த நிகழ்வில் பொதுமக்கள் பாதுகாப்பு அமைச்சு, குடிவரவு, குடியகல்வு திணைக்களம், சட்டமா அதிபர் திணைக்களம் மற்றும் சட்ட வரைஞர் திணைக்களத்தின் அதிகாரிகள் பலரும் கலந்துகொண்டனர்.
முக்கிய விடயங்கள்
- இரண்டு பழைய சட்டங்களுக்குப் பதிலாக சர்வதேச தரங்களுக்கு ஏற்ற புதிய சட்டக் கட்டமைப்பு அறிமுகப்படுத்தப்படுகிறது.
- உயர் நீதிமன்றத் தீர்மானத்திற்கு அமைய குழுநிலை திருத்தங்களுக்கு உட்பட்டு அனுமதி வழங்கப்பட்டது.
- கடவுச்சீட்டில் முத்திரையிடப்படாத தானியங்கி மின்னணு வாயில்களைப் பயன்படுத்துவதற்கான சட்ட ரீதியான வசதிகள் ஏற்படுகின்றன.
பழைய சட்டங்களுக்குப் பதிலாக புதிய சட்டங்கள்
351ஆம் அதிகாரமான குடிவரவு, குடியகல்வு சட்டம் மற்றும் 1971ஆம் ஆண்டின் 53ஆம் இலக்க கடவுச்சீட்டுகள் மற்றும் வெளியேறும் அனுமதிச் சட்டம் ஆகியவற்றை இரத்து செய்து இந்த புதிய சட்டம் கொண்டுவரப்படுவதாக அதிகாரிகள் இங்கு விளக்கமளித்தனர். உயிரியல் அளவீட்டுத் தகவல்களைப் பெற்றுக்கொள்ளும் போதும் களஞ்சியப்படுத்தும் போதும் தனிநபர் தரவுப் பாதுகாப்புச் சட்டத்திற்கு அமைவாக செயற்படுவதற்கான சட்டப் பாதுகாப்பும் உறுதி செய்யப்பட்டுள்ளது.
மேலும், இதுவரை நிலவி வந்த கட்டுப்பாட்டாளர், பிரதி கட்டுப்பாட்டாளர் மற்றும் அதிகாரமளிக்கப்பட்ட அதிகாரி ஆகிய பதவிகளுக்குப் பதிலாக கட்டுப்பாட்டாளர் நாயகம், மேலதிக கட்டுப்பாட்டாளர் நாயகம் மற்றும் குடிவரவு அதிகாரிகள் என பதவிப் பெயர்கள் புதுப்பிக்கப்படவுள்ளதாகவும் குறிப்பிடப்பட்டது.
சட்டவிரோத செயற்பாடுகளைக் கட்டுப்படுத்துவதற்கான நடவடிக்கைகள்
சட்டவிரோதமாக நாட்டிற்குள் நுழைவதைத் தடுக்கும் நோக்கில், அமைச்சரின் கோரிக்கைக்கு அமைய ஜனாதிபதியினால் வர்த்தமானி அறிவித்தல் மூலம் அதிகாரம் அளிக்கப்படும் முப்படையினர் மற்றும் கடலோரக் காவல் படை அதிகாரிகளுக்கு மட்டுப்படுத்தப்பட்ட அதிகாரங்களைச் செயற்படுத்துவதற்கான ஏற்பாடுகளும் இதில் செய்யப்பட்டுள்ளன.
அத்துடன், நாட்டிலிருந்து சட்டப்பூர்வமாக வெளியேறி வேறு நாட்டிற்குச் சென்று அங்கு போலி கடவுச்சீட்டுகளைப் பயன்படுத்தி மேற்கொள்ளப்படும் ஆட்கடத்தல் மற்றும் திட்டமிட்ட குற்றங்கள் தொடர்பில் இலங்கையின் சட்டத்தின் கீழ் வழக்குத் தொடரவும், அவற்றை மேல் நீதிமன்றத்தில் விசாரணை செய்யவும் சட்ட ரீதியான அதிகாரம் கிடைக்கிறது. கடவுச்சீட்டில் முத்திரையிடப்படாமல் தானியங்கி மின்னணு வாயில்களைப் பயன்படுத்துவது மற்றும் இலங்கையர்களைத் திருமணம் செய்யும் வெளிநாட்டவர்களுக்கு விசா வழங்குவதில் ஏற்படும் பிரச்சினைகள் தொடர்பிலும் இக்குழுவின் கவனம் செலுத்தப்பட்டுள்ளது.






