இலங்கை மற்றும் பங்களாதேஷ் ஆகிய நாடுகளுக்கிடையிலான நீண்டகால நட்புறவை மேலும் வலுப்படுத்தும் நோக்கில் பங்களாதேஷிற்கு உத்தியோகபூர்வ விஜயம் ஒன்றை மேற்கொள்ளுமாறு அந்நாட்டுப் பிரதமர் தாரிக் ரஹ்மான், ஜனாதிபதி அநுர குமார திசாநாயக்கவிற்கு உத்தியோகபூர்வ அழைப்பு விடுத்துள்ளார்.

குறித்த உத்தியோகபூர்வ அழைப்பை பங்களாதேஷின் வெளிவிவகார இராஜாங்க அமைச்சர் ஹுமாயூன் கொபீர் இன்று (18) ஜனாதிபதி செயலகத்தில் வைத்து ஜனாதிபதியிடம் கையளித்தார். இரு நாடுகளுக்கும் இடையே அரசியல், வணிகம், கலாசாரம் மற்றும் கல்வி உள்ளிட்ட பல துறைகளில் உறவுகளை வலுப்படுத்துவது தொடர்பில் இதன்போது இருதரப்பினருக்கும் இடையில் கலந்துரையாடப்பட்டது.

முக்கிய விடயங்கள்

  • பங்களாதேஷ் பிரதமர் தாரிக் ரஹ்மானிடமிருந்து ஜனாதிபதி அநுர குமார திசாநாயக்கவிற்கு உத்தியோகபூர்வ அழைப்பு கிடைத்துள்ளது.
  • அழைப்பிதழ் அந்நாட்டு வெளிவிவகார இராஜாங்க அமைச்சரினால் இன்று (18) ஜனாதிபதி செயலகத்தில் வைத்து கையளிக்கப்பட்டது.
  • 'க்ளீன் ஸ்ரீலங்கா' மற்றும் வறுமை ஒழிப்பு வேலைத்திட்டங்கள் குறித்து பங்களாதேஷ் அரசு பாராட்டு தெரிவித்துள்ளது.

'க்ளீன் ஸ்ரீலங்கா' குறித்து பங்களாதேஷ் பாராட்டு

ஜனாதிபதி அநுர குமார திசாநாயக்கவின் தலைமையில் முன்னெடுக்கப்படும் 'க்ளீன் ஸ்ரீலங்கா' வேலைத்திட்டம் மற்றும் வறுமை ஒழிப்பு அபிவிருத்தி திட்டங்கள் தொடர்பில் பங்களாதேஷ் பிரதமர் உள்ளிட்ட அரசாங்கம் மிகுந்த பாராட்டுக்களைத் தெரிவிப்பதாக ஹுமாயூன் கொபீர் இதன்போது குறிப்பிட்டார். அவ்வேலைத்திட்டத்தின் முன்மாதிரி தனது நாட்டிற்கும் முக்கியமானது எனவும் அவர் தெரிவித்தார்.

ஆடை உற்பத்தி, சுற்றுலா மற்றும் புதுப்பிக்கத்தக்க சக்தி போன்ற துறைகளில் ஒத்துழைப்பை மேலும் விரிவுபடுத்தி, இரு நாடுகளுக்கும் பயனளிக்கும் வகையில் செயற்பட எதிர்பார்ப்பதாகவும் இராஜாங்க அமைச்சர் கூறினார்.

இரு நாடுகளினதும் எதிர்கால ஒத்துழைப்பு

பரஸ்பர புரிதல் மற்றும் நம்பிக்கையின் அடிப்படையில் எதிர்காலத்தில் இரு நாடுகளுக்கும் இடையிலான உறவுகள் மேலும் வலுப்பெறும் என்று ஜனாதிபதி அநுர குமார திசாநாயக்க இதன்போது நம்பிக்கை வெளியிட்டார்.

அத்துடன், இலங்கையின் புதுப்பிக்கத்தக்க சக்தி துறையில் செயற்படும் உள்நாட்டு நிறுவனங்களுக்கு, பங்களாதேஷில் அத்துறையின் அபிவிருத்தி மற்றும் மேம்பாட்டிற்காக பங்களிப்பு செய்வதற்கான வாய்ப்பு உள்ளதாகவும் ஜனாதிபதி மேலும் சுட்டிக்காட்டினார்.

இதையும் படியுங்கள்

  • கிரிஷ் கொடுக்கல் வாங்கல்: நாமல் ராஜபக்ஷவிற்கு வழங்கப்பட்ட பிணை மேல் நீதிமன்றத்தினால் இடைநிறுத்தம்
  • ஜனாதிபதி அநுர குமார திசாநாயக்கவிற்கு பங்களாதேஷிற்கு உத்தியோகபூர்வ விஜயம் மேற்கொள்வதற்கான அழைப்பு
  • விளக்கமறியலில் உள்ள நாமல் ராஜபக்ஷவிடமிருந்து மஹிந்தவிற்கு உருக்கமான பிறந்தநாள் வாழ்த்து