பிரதமர் ஹரினி அமரசூரிய இந்திய உளவுத்துறையின் உறுப்பினர் என்றும், தற்போதைய அரசாங்கம் இந்தியாவின் அரசியல் தேவைகளை இலங்கைக்குள் நடைமுறைப்படுத்தி வருவதாகவும் பலாங்கொடை கஸ்ஸப தேரர் சர்ச்சைக்குரிய கருத்தொன்றை வெளியிட்டுள்ளார். அநுராதபுரம் புனித நகர அபிவிருத்தி திட்டங்கள் தொடர்பில் அரசாங்கம் எடுத்துள்ள தீர்மானங்களுக்கு எதிராக பிக்குகள் குழுவொன்றுடன் அநுராதபுரத்தில் முன்னெடுக்கப்பட்டு வரும் தொடர் சத்தியாக்கிரக போராட்டத்தின் போது, ஊடகங்களுக்கு கருத்து தெரிவிக்கும்போதே அவர் இதனைக் குறிப்பிட்டார்.
தேசிய மக்கள் சக்தி மற்றும் மக்கள் விடுதலை முன்னணியை பிரதிநிதித்துவப்படுத்தும் பிரதமர், இந்தியாவின் அரசியல் நோக்கங்களை நிறைவேற்ற முன்னிற்பதாக தெரிவித்த அவர், அவரது தனிப்பட்ட வாழ்க்கையையும் விமர்சித்ததுடன், குடும்பமோ அல்லது பிள்ளைகளோ இல்லாத ஒரு பெண் எவ்வாறு நாட்டின் எதிர்காலத்தை நோக்குவார் எனவும் கேள்வி எழுப்பினார்.
முக்கிய விடயங்கள்
- பிரதமர் இந்திய உளவுத்துறை உறுப்பினர் என கஸ்ஸப தேரர் குற்றச்சாட்டு.
- ஜனாதிபதி அநுர குமார திசாநாயக்க இந்திய சார்பு பொம்மை ஆட்சியாளர் என விமர்சனம்.
- அநுராதபுர அபிவிருத்தி திட்ட தீர்மானங்களுக்கு எதிரான சத்தியாக்கிரகத்தின் போது இக்கருத்துக்கள் வெளியீடு.
- இந்திய ஆக்கிரமிப்புக்கு எதிராக உயிரை தியாகம் செய்யவும் அல்லது சிறை செல்லவும் தயார் என அறிவிப்பு.
அரசாங்கத்திற்கும் வர்த்தமானி அறிவித்தலுக்கும் எதிரான குற்றச்சாட்டுகள்
தற்போதைய ஜனாதிபதி அநுர குமார திசாநாயக்கவை இந்திய சார்பு பொம்மை ஆட்சியாளர் என வர்ணித்த கஸ்ஸப தேரர், இந்திய பிரதமர் நரேந்திர மோடியின் தேவைக்கேற்ப நாட்டின் கலாசார மரபுரிமைகளை சூறையாடும் திட்டமொன்று முன்னெடுக்கப்பட்டு வருவதாகவும் தெரிவித்தார். அநுராதபுரம் புனித நகரத்திற்காக வெளியிடப்பட்டுள்ள வர்த்தமானி அறிவித்தலில் உள்ள கலாசார பாதிப்புகளை வார்த்தைக்கு வார்த்தை எடுத்து விளக்க தாம் தயாராக உள்ளதாகவும் அவர் குறிப்பிட்டார்.
காலை உணவை இங்கிருந்தும் மதிய உணவை டெல்லியிலிருந்தும் உட்கொள்ளும் ஆட்சியாளர்களிடமிருந்து நாட்டிற்கு ஒரு நல்ல எதிர்காலத்தை எதிர்பார்க்க முடியாது என்றும், அநுராதபுரத்திற்கு ஏதேனும் பாதிப்பு ஏற்படுமாயின் அதற்கு எதிராக அனைத்து பௌத்த பிக்குகளும் பிக்குணிகளும் ஒன்றிணைய வேண்டும் என்றும் அவர் தெரிவித்தார்.
பகிரங்க சவாலும் அடுத்தகட்ட தீர்மானமும்
தனது நடவடிக்கையை எதிர்க்கும் எந்தவொரு தரப்பினரையும் ருவன்வெலிசாய மற்றும் ஸ்ரீ மகா போதிக்கு முன்பாக விவாதத்திற்கு வருமாறு அவர் சவால் விடுத்தார். அன்று வாரியபொல ஸ்ரீ சுமங்கல தேரர் பிரித்தானிய கொடியை கீழே இறக்கி சிங்கள கொடியை ஏற்றியது போன்று, இன்று இந்திய கொடியை கீழே வீசி சிங்கள கொடியை ஏற்றுவதற்கு தாம் தயாராக இருப்பதாக அவர் வலியுறுத்தினார்.
இந்திய ஆக்கிரமிப்புக்கு எதிராக முதல் உயிர்த்தியாகம் செய்யவும், சிறை செல்லவும் தாம் தயார் எனக் கூறிய அவர், யாராலும் இந்த போராட்டத்தை நிறுத்த முடியாது என்றும், இது வெற்றியில் மட்டுமே முடிவடையும் என்றும் மேலும் தெரிவித்தார்.
இது பற்றியும் படியுங்கள்
- முன்னாள் ஜனாதிபதி ரணில் மற்றும் சமன் ஏக்கநாயக்கவுக்கு எதிரான வழக்கு இன்று மீண்டும் விசாரணைக்கு
- பரிசுப் பார்சல்களை கோரிய ரஞ்சன் ஜயலாலின் பேச்சு விவகாரம் இலஞ்ச ஆணைக்குழுவுக்கும் சென்றது
- சில மீற்றர்கள் தூரத்தில் உள்ள தலைவரை சந்திக்காமல் ஊடக நாடகம் நடத்துவதாக அமைச்சர் குற்றச்சாட்டு
