தமிழ் தேசிய கூட்டமைப்பை பிரதிநிதித்துவப்படுத்திய முன்னாள் பாராளுமன்ற உறுப்பினர் எம்.கே. சிவாஜிலிங்கம் நேற்று (14) இரவு காலமானதாக தெரிவிக்கப்படுகிறது. கடந்த சில காலமாக சுகவீனமுற்றிருந்த அவர், உயிரிழக்கும் போது 69 வயதாகியிருந்தார்.
தற்போது வல்வெட்டித்துறை நகர சபையின் தவிசாளராகவும் கடமையாற்றி வந்த இவர், வடமராட்சி, வல்வெட்டித்துறை பகுதியை பூர்வீகமாகக் கொண்டவராவார்.
முக்கிய விடயங்கள்
- மரணமடையும் போது அவருக்கு வயது 69.
- நோய் நிலைமை காரணமாக நேற்று (14) இரவு காலமானார்.
- 2001 மற்றும் 2004 ஆம் ஆண்டுகளில் யாழ். மாவட்டத்தைப் பிரதிநிதித்துவப்படுத்தி பாராளுமன்றத்திற்குத் தெரிவானார்.
- இறுதிக்கிரியைகள் யாழ்ப்பாணம், வல்வெட்டித்துறையில் நடைபெறவுள்ளன.
அரசியல் பயணம்
தமிழீழ விடுதலை இயக்கம் (TELO) ஊடாக அரசியலில் பிரவேசித்த சிவாஜிலிங்கம், பின்னர் பல தமிழ் கட்சிகள் இணைந்து தமிழ் தேசிய கூட்டமைப்பை உருவாக்குவதிலும் தீவிர பங்களிப்பை வழங்கியிருந்தார்.
கடந்த 2001 மற்றும் 2004 ஆம் ஆண்டுகளில் தமிழ் தேசிய கூட்டமைப்பின் கீழ் யாழ். மாவட்டத்தில் போட்டியிட்ட இவர், இருமுறை பாராளுமன்றத்திற்குத் தெரிவானார். அதுமட்டுமன்றி, 2010 ஆம் ஆண்டு ஜனாதிபதித் தேர்தலின் போது சுயேச்சை வேட்பாளராகவும் போட்டியிட்டிருந்தார்.
மக்களின் உரிமைகளுக்காக குரல் கொடுத்தமை
2013 ஆம் ஆண்டு வட மாகாண சபை உறுப்பினராகத் தெரிவு செய்யப்பட்ட சிவாஜிலிங்கம், வடக்கு, கிழக்கு மக்கள் எதிர்நோக்கிய பிரச்சினைகளுக்காக தொடர்ச்சியாக குரல் கொடுத்து வந்தார். யுத்தம் நிறைவடைந்ததன் பின்னர் அப்பகுதிகளில் முன்னெடுக்கப்பட்ட போராட்டங்கள் மற்றும் உண்ணாவிரதப் போராட்டங்களுக்கு அவர் தலைமை தாங்கிச் செயற்பட்டிருந்தார்.
அடுத்த கட்டம் என்ன?
காலமான எம்.கே. சிவாஜிலிங்கத்தின் பூதவுடல் மீதான இறுதிக்கிரியைகள் யாழ்ப்பாணம், வல்வெட்டித்துறையில் இடம்பெறவுள்ளதாக தெரிவிக்கப்பட்டுள்ளது.
