லாஃப்ஸ் எரிவாயு நிறுவனம் மற்றும் வர்த்தக, வாணிப, உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க ஆகியோருக்கு இடையே இன்றைய தினம் (17) விசேட கலந்துரையாடல் ஒன்று நடைபெறவுள்ளதாக தெரிவிக்கப்படுகிறது.
எரிவாயு விலையைக் குறைப்பது தொடர்பிலேயே இந்தக் கலந்துரையாடல் ஏற்பாடு செய்யப்பட்டுள்ளதாக தகவல்கள் தெரிவிக்கின்றன. அண்மையில் அதிகரிக்கப்பட்ட எரிவாயு விலையில் ஒரு பகுதியை மீண்டும் குறைப்பதற்கு குறித்த நிறுவனம் ஏற்கனவே இணக்கம் தெரிவித்துள்ளதாகவும் மேலும் அறியமுடிகிறது.
முக்கிய விடயங்கள்
- எரிவாயு விலையைக் குறைப்பது தொடர்பில் இன்றைய தினம் (17) விசேட கலந்துரையாடல் நடைபெறுகின்றது.
- அண்மையில் அதிகரிக்கப்பட்ட விலையில் ஒரு பகுதியைக் குறைப்பதற்கு இணக்கம் காணப்பட்டுள்ளதாக தெரிவிக்கப்படுகிறது.
- கடந்த 13 ஆம் திகதி நள்ளிரவு முதல் லாஃப்ஸ் எரிவாயுவின் விலை பெருமளவில் அதிகரிக்கப்பட்டிருந்தது.
அண்மையில் விலை அதிகரிக்கப்பட்ட விபரம்
லாஃப்ஸ் எரிவாயு நிறுவனம் கடந்த 13 ஆம் திகதி நள்ளிரவு முதல் அமுலுக்கு வரும் வகையில் எரிவாயு விலையை அதிகரிக்க நடவடிக்கை எடுத்திருந்தது.
இதற்கமைய, 4,965 ரூபாவாக இருந்த 12.5 கிலோகிராம் வீட்டுப் பயன்பாட்டு எரிவாயு சிலிண்டரின் விலை 1,775 ரூபாவால் அதிகரிக்கப்பட்டதுடன், 1,988 ரூபாவாக இருந்த 5 கிலோகிராம் வீட்டுப் பயன்பாட்டு எரிவாயு சிலிண்டரின் விலை 732 ரூபாவால் அதிகரிக்கப்பட்டிருந்தமை குறிப்பிடத்தக்கது.






