கிழக்கு பிரான்சில் வெள்ளிக்கிழமை காலை பாடசாலை மாணவர்களை ஏற்றிச் சென்ற பஸ் ஒன்று கோர விபத்துக்குள்ளானது. இந்த விபத்தில் 7 வயது சிறுமி ஒருவரும் 18 வயது இளைஞர் ஒருவரும் உயிரிழந்துள்ளதாக போக்குவரத்து அமைச்சர் பிலிப் தபாரோட் உறுதிப்படுத்தியுள்ளார். அய்ன் பிராந்திய அதிகாரிகளின் தகவல்படி, மூவர் பலத்த காயமடைந்தது உட்பட 16 பேர் காயமடைந்துள்ளனர்.
பிராந்திய அதிகாரசபையினால் இயக்கப்பட்டு வந்த இந்த பஸ்சில், விபத்து இடம்பெற்ற போது ஏனைய பயணிகளுடன் சுமார் 15 மாணவர்களும் பயணித்துள்ளனர்.
முக்கிய தகவல்கள்
- விபத்தில் 7 வயது சிறுமியும் 18 வயது இளைஞரும் உயிரிழந்தனர்.
- 16 பேர் காயமடைந்துள்ளதுடன், அதில் மூவர் பலத்த காயங்களுக்குள்ளாகியுள்ளனர்.
- பஸ் வீதியை விட்டு விலகி, மரங்களில் மோதி பள்ளத்தில் கவிழ்ந்தது.
வீதியை விட்டு விலகி பள்ளத்தில் விழுந்த பஸ்
லியோன் நகருக்கு வடகிழக்கே உள்ள ஒரு கிராமப்புற பகுதியில் இந்த விபத்து நிகழ்ந்துள்ளது. உள்ளூர் இடைநிலை மற்றும் உயர் பாடசாலைகளுக்குச் செல்லும் மாணவர்களே பஸ்சில் இருந்ததாக பி.எப்.எம் தொலைக்காட்சி செய்தி வெளியிட்டுள்ளது. சம்பவம் நடந்த இடத்தில் எடுக்கப்பட்ட படங்கள், பஸ் வீதியை விட்டு விலகி, மரங்களில் மோதி பள்ளத்திற்குள் கவிழ்ந்துள்ளதை வெளிப்படுத்தியுள்ளன.
பிரான்சின்போ ஊடகத்திற்கு கருத்து தெரிவித்த லென்ட் நகர முதல்வர் இவ்ஸ் கிரிஸ்டின், பனிமூட்டம் இன்றி வானிலை தெளிவாக இருந்த போதிலும், வீதி சற்று ஈரப்பதமாக காணப்பட்டதாகத் தெரிவித்தார். எனினும், பஸ் எவ்வாறு கட்டுப்பாட்டை இழந்து வீதியை விட்டு விலகியது என்பது குறித்து அதிகாரிகள் குழப்பமடைந்துள்ளனர்.
"எமது மாணவர்கள், எமது பிள்ளைகள் இதுபோன்ற விபத்துக்களுக்கு உள்ளாவது எப்போதுமே ஒரு கடினமான தருணமாகும். எனது எண்ணங்களும், அரசாங்கத்தின் மற்றும் முழு கல்விச் சமூகத்தினதும் ஆதரவும் பாதிக்கப்பட்ட குடும்பங்களுடனேயே உள்ளன" என்று எடுவார்ட் ஜெப்ரே தெரிவித்தார்.
