பாக்குநீரிணைக்கு அப்பால் வசிக்கும் குறிப்பிட்ட சில வெளிநாட்டு பிரஜைகளுக்கு இந்தியாவில் இருந்து முக்கிய மாற்றங்கள் அறிவிக்கப்பட்டுள்ளன. இலங்கைத் தமிழர்கள் மற்றும் திபெத்தியர்கள் உட்பட பல்வேறு தரப்பினருக்கான நிலையான கடவுச்சீட்டு மற்றும் விசா நிபந்தனைகளை இந்திய அரசு தளர்த்தியுள்ளது.
தி இந்தியன் எக்ஸ்பிரஸ் நாளிதழின் தகவல்படி, இந்திய மத்திய உள்துறை அமைச்சு குடிவரவு மற்றும் வெளிநாட்டினர் (விலக்கு) (திருத்த) ஆணை, 2026 ஊடாக இந்த மாற்றங்களை உத்தியோகபூர்வமாக அறிவித்துள்ளதுடன், இது தொடர்பான வர்த்தமானி அறிவித்தல் வியாழக்கிழமை வெளியிடப்பட்டது.
முக்கிய விடயங்கள்
- 2015 ஜனவரி 9 அல்லது அதற்கு முன்னர் இந்தியாவில் தஞ்சமடைந்த பதிவுசெய்யப்பட்ட இலங்கைத் தமிழர்களுக்கு கடவுச்சீட்டு மற்றும் விசா விலக்குகள் வழங்கப்பட்டுள்ளன.
- இந்த மாற்றங்கள் இந்திய மத்திய உள்துறை அமைச்சினால் உத்தியோகபூர்வ வர்த்தமானி அறிவித்தல் மூலம் வெளியிடப்பட்டுள்ளன.
- பாகிஸ்தான், பங்களாதேஷ், ஆப்கானிஸ்தான், திபெத், மலேசியா மற்றும் சிங்கப்பூர் ஆகிய நாடுகளைச் சேர்ந்த குறிப்பிட்ட தரப்பினருக்கும் இந்த விலக்குகள் பொருந்தும்.
இலங்கைத் தமிழர்களுக்கும் திபெத்தியர்களுக்கும் நிவாரணம்
திருத்தப்பட்ட விதிகளின் கீழ், 2015 ஜனவரி 9 அல்லது அதற்கு முன்னர் இந்தியாவில் தஞ்சம் கோரிய பதிவுசெய்யப்பட்ட இலங்கைத் தமிழ் பிரஜைகளுக்கு வழக்கமான பயண ஆவணம் மற்றும் விசா நிபந்தனைகளில் இருந்து விலக்கு அளிக்கப்பட்டுள்ளது.
குறிப்பிட்ட திபெத்திய பிரஜைகளுக்கும் இந்த விலக்குகள் கிடைக்கின்றன. 1959 மற்றும் 2003 மே 30 இற்கு இடைப்பட்ட காலப்பகுதியில் காத்மண்டுவில் உள்ள இந்திய தூதரகத்தின் அனுமதியுடன் இந்தியாவுக்குள் நுழைந்தவர்கள் அல்லது பின்னர் இந்தியா-நேபாள எல்லைப் பகுதிகளில் உள்ள குறிப்பிட்ட சோதனைச் சாவடிகள் ஊடாக விசேட அனுமதி பெற்று வந்தவர்கள் இதில் அடங்குவர்.
ஏனைய வெளிநாட்டு பிரஜைகளும் உள்வாங்கல்
குடியேறும் நோக்கத்துடன் 2009 டிசம்பர் 31 அல்லது அதற்கு முன்னர் இந்தியா வந்தடைந்த போதிலும், பாகிஸ்தானால் வழங்கப்பட்ட கணினிமயமாக்கப்பட்ட தேசிய அடையாள அட்டை (CNIC) இல்லாத காரணத்தினால் தமது கடவுச்சீட்டுகளை புதுப்பிக்க முடியாத பாகிஸ்தானியர்களுக்கும் இந்த தளர்வு விதிகள் பொருந்தும்.
மத ரீதியான துன்புறுத்தல் அல்லது அது குறித்த அச்சம் காரணமாக 2024 டிசம்பர் 31 அல்லது அதற்கு முன்னர் இந்தியாவுக்குள் நுழைந்த ஆப்கானிஸ்தான், பங்களாதேஷ் மற்றும் பாகிஸ்தான் ஆகிய நாடுகளைச் சேர்ந்த மத சிறுபான்மையினருக்கும் இந்த சலுகை வழங்கப்பட்டுள்ளது.
மேலும், மலேசிய அல்லது சிங்கப்பூர் குடியுரிமை பெற்று, காலாவதியான கடவுச்சீட்டுகளுடன் 2009 டிசம்பர் 31 அல்லது அதற்கு முன்னர் மீண்டும் இந்தியா திரும்பிய குறிப்பிட்ட இந்திய வம்சாவளியினருக்கும் இந்த விலக்குகள் நீட்டிக்கப்பட்டுள்ளன. அத்துடன் இந்தியா, நேபாளம் மற்றும் பூட்டான் ஆகிய மூன்று நாடுகளுக்கும் இடையே பயணம் செய்யும் அந்தந்த நாட்டு பிரஜைகளுக்கான பயண விதிமுறைகளும் இலகுபடுத்தப்பட்டுள்ளன.
