குடியரசுக் கட்சி அடைந்த தேர்தல் தோல்விக்கு ஈரான் போரும் இஸ்ரேலுடனான உறவுகளுமே முக்கிய காரணம் என அமெரிக்க துணை ஜனாதிபதி ஜே.டி. வான்ஸ் தெரிவித்துள்ளார். 2024 ஆம் ஆண்டில் டொனால்ட் டிரம்பிற்கு வாக்களித்த பலர் தற்போதைய நிர்வாகத்தின் கொள்கைகளுக்கு எதிர்ப்புத் தெரிவித்து ஏனைய தரப்புகளுக்கு ஆதரவாக மாறியுள்ளதாகவும் அவர் சுட்டிக்காட்டியுள்ளார்.
X சமூக ஊடகம் வழியாக கருத்து தெரிவித்த துணை ஜனாதிபதி வான்ஸ், ஆதரவாளர்கள் வாக்களிக்க வராமல் இருந்தமை இதற்கு முதன்மைக் காரணம் அல்ல எனத் தெரிவித்துள்ளார். 2024 ஜனாதிபதித் தேர்தலில் டிரம்ப்-வான்ஸ் தலைமைத்துவத்திற்கு வாக்களித்த குறிப்பிடத்தக்க தொகையினர், இம்முறை இடைக்காலத் தேர்தலில் கட்சிக்கு எதிராக வாக்களித்துள்ளனர் என அவர் குறிப்பிட்டுள்ளார்.
முக்கிய விடயங்கள்- 2024 இல் டிரம்பை ஆதரித்த தரப்பினர் சிலர் இம்முறை எதிராக வாக்களித்துள்ளதாக துணை ஜனாதிபதி தெரிவிப்பு
- ஜனநாயகக் கட்சி பிரதிநிதிகள் சபை மற்றும் செனட் சபையின் அதிகாரத்தை உறுதிப்படுத்தியுள்ளது
- தான் வாக்குச்சீட்டில் இல்லாதிருந்ததே தோல்விக்குக் காரணம் என டொனால்ட் டிரம்ப் தெரிவிப்பு
ஜனநாயகக் கட்சி வசமான அதிகாரம்
தேர்தலின் இந்த முடிவுகளையடுத்து, ஜனநாயகக் கட்சி பிரதிநிதிகள் சபை மற்றும் செனட் சபை ஆகியவற்றின் அதிகாரத்தை உறுதிப்படுத்தியுள்ளதுடன், இது டிரம்ப் நிர்வாகத்திற்கு ஏற்பட்ட கடுமையான பின்னடைவாகக் கருதப்படுகிறது.
இதனூடாக தற்போதைய நிர்வாகத்தின் முடிவுகள், பொருளாதாரம் மற்றும் ஈரானுடனான போர்ச் சூழல் ஆகியவற்றை தீவிர விசாரணைக்கு உட்படுத்த ஜனநாயகக் கட்சிக்கு வாய்ப்புக் கிடைத்துள்ளது.
டிரம்பின் நிலைப்பாடு
எவ்வாறாயினும், இந்தத் தேர்தல் தோல்வியை தனக்கு எதிரான பின்னடைவாக கருதவில்லை என ஜனாதிபதி டொனால்ட் டிரம்ப் கூறியுள்ளார். பாக்ஸ் நியூஸ் (Fox News) தொலைக்காட்சிக்கு தொலைபேசி ஊடாக கருத்து தெரிவித்த அவர், தனது நிர்வாகத்தின் கீழ் பொருளாதாரம் உள்ளிட்ட பல துறைகளில் வரலாற்றுச் சிறப்புமிக்க வெற்றிகள் ஈட்டப்பட்டதாகக் குறிப்பிட்டார்.
வேட்பாளர்களால் வாக்காளர்களை உற்சாகப்படுத்த முடியாமல் போனதும், தான் வாக்குச்சீட்டில் இடம்பெறாமல் இருந்தமையுமே இந்தத் தோல்விக்குக் காரணம் என அவர் மேலும் கூறியுள்ளதாக சர்வதேச ஊடகங்கள் தெரிவிக்கின்றன.
இதையும் வாசியுங்கள்- அமெரிக்க செனட் சபைக்கு தெரிவான முதலாவது முஸ்லிம் நபராக அப்துல் எல்-சயீத் வரலாற்று சாதனை
- கனடாவுடன் வர்த்தக ஒப்பந்தத்தை எட்ட நெருங்கிவிட்டதாக டிரம்ப் அறிவிப்பு, ஆனால் இன்னும் பணிகள் எஞ்சியுள்ளதாக கார்னி கருத்து
- இந்தியா-பாகிஸ்தான் உலகக் கிண்ணப் போட்டியைப் பார்க்க 8.4 மில்லியன் டிக்கெட் கோரிக்கைகள்
