රිපබ්ලිකන් පක්ෂයට අත්වූ මැතිවරණ පරාජයට ඉරාන යුද්ධය මෙන්ම ඊශ්‍රායලය සමඟ පවතින සබඳතා ප්‍රධාන හේතුවක් වූ බව අමෙරිකානු උප ජනාධිපති ජේ.ඩි. වැන්ස් සඳහන් කර තිබේ. 2024 වසරේදී ඩොනල්ඩ් ට්‍රම්ප් වෙත ඡන්දය ලබා දුන් බොහෝ දෙනෙකු වත්මන් පරිපාලනයේ ප්‍රතිපත්ති ගැන විරෝධය පාමින් වෙනත් පාර්ශ්ව වෙත නැඹුරු වී ඇති බව ඔහු පෙන්වා දී ඇත.
X සමාජ මාධ්‍ය ඔස්සේ අදහස් දක්වමින් උප ජනපති වැන්ස් පවසා ඇත්තේ පාක්ෂිකයන් ඡන්දය දීමට නොපැමිණීම මෙයට ප්‍රධාන හේතුව නොවන බවයි. 2024 ජනාධිපතිවරණයේදී ට්‍රම්ප්-වැන්ස් නායකත්වයට ඡන්දය ලබා දුන් සැලකිය යුතු පිරිසක් මෙවර මධ්‍යකාලීන මැතිවරණයේදී පක්ෂයට එරෙහිව ඡන්දය භාවිත කර ඇති බව ඔහු සඳහන් කර තිබේ.
ඩිමොක්‍රටික් පක්ෂයට ලැබුණු බලය
මැතිවරණයේ මෙම ප්‍රතිඵලයත් සමඟ ඩිමොක්‍රටික් පක්ෂය නියෝජිත මන්ත්‍රී මණ්ඩලයේ සහ සෙනෙට් සභාවේ බලය තහවුරු කර ගැනීමට සමත්ව ඇති අතර එය ට්‍රම්ප් පාලනයට එල්ල වූ දැඩි පහරක් ලෙස සැලකේ.
මේ හරහා වත්මන් පාලනාධිකාරයේ තීරණ, ආර්ථිකය මෙන්ම ඉරානය සමඟ පවතින යුදමය වාතාවරණය ද දැඩි විමර්ශනයකට ලක් කිරීමට ඩිමොක්‍රටික් පක්ෂයට අවස්ථාව උදා වේ.
ට්‍රම්ප්ගේ ස්ථාවරය
කෙසේ වෙතත්, මෙම මැතිවරණ පරාජය තමන් වෙත එල්ල වූ පහරක් හැටියට නොසලකන බව ජනාධිපති ඩොනල්ඩ් ට්‍රම්ප් පවසා තිබේ. ෆොක්ස් නිව්ස් (Fox News) නාලිකාව සමඟ දුරකථනයෙන් සම්බන්ධ වෙමින් ඔහු ප්‍රකාශ කර ඇත්තේ තම පාලනය තුළ ආර්ථිකය ඇතුළු ක්ෂේත්‍ර ගණනාවක ඉතිහාසයේ විශිෂ්ටතම ජයග්‍රහණ අත්කර දුන් බවයි.
අපේක්ෂකයන්ට ඡන්දදායකයන් උනන්දු කරවීමට නොහැකි වීම සහ තමන් ඡන්ද පත්‍රිකාවේ නොසිටීම මෙම පරාජයට හේතු වූ බව ඔහු වැඩිදුරටත් කියා සිටි බව විදෙස් මාධ්‍ය වාර්තා කරයි.
