பெரு நாட்டின் மத்திய பகுதியை மையமாகக் கொண்டு ரிக்டர் அளவுகோலில் 6.8 அலகுகள் கொண்ட சக்திவாய்ந்த நிலநடுக்கம் ஒன்று ஏற்பட்டுள்ளது. இந்த அதிர்வு நாட்டின் தலைநகரான லிமாவிலும் உணரப்பட்டதாக சர்வதேச ஊடகங்கள் தெரிவிக்கின்றன.
பெரு நாட்டின் புவி இயற்பியல் நிறுவனத்தின் தகவலின்படி, ஆண்டிஸ் மலைத்தொடரின் ஜுனின் பகுதியை அண்டிய தரைமட்டத்திலிருந்து சுமார் 129 கிலோமீற்றர் ஆழத்தில் இந்த நிலநடுக்கம் உருவாகியுள்ளது.
முக்கிய விடயங்கள்
- நிலநடுக்கத்தின் அளவு ரிக்டர் அளவுகோலில் 6.8 அலகுகளாகப் பதிவானது
- ஆண்டிஸ் மலைத்தொடரின் ஜுனின் பகுதியை அண்டிய பகுதியில் 129 கிலோமீற்றர் ஆழத்தில் ஏற்பட்டுள்ளது
- தலைநகர் லிமாவிலும் அதிர்வு உணரப்பட்டது
- உயிர்ச்சேதங்களோ அல்லது பொருட்சேதங்களோ எதுவும் இதுவரை பதிவாகவில்லை
வெளியே ஓடிய நாடாளுமன்ற உறுப்பினர்களும் பொதுமக்களும்
நில அதிர்வு ஏற்பட்டதை அடுத்து அதிர்ச்சியடைந்த தலைநகர் லிமா மக்கள் வீடுகளை விட்டு வெளியேறி வீதிகளில் தஞ்சம் புகுந்தனர். அதேவேளை, அந்த நேரத்தில் நாடாளுமன்ற உறுப்பினர்களும் நாடாளுமன்றக் கட்டடத்தை விட்டு உடனடியாக வெளியேறியதாகத் தெரிவிக்கப்படுகிறது.
எவ்வாறாயினும், இந்த நிலநடுக்கத்தினால் உயிரிழப்புகளோ அல்லது பாரிய பொருட்சேதங்களோ எதுவும் ஏற்படவில்லை என்று வெளிநாட்டு ஊடகங்கள் மேலும் தெரிவித்துள்ளன.






