නීතිය ක්‍රියාත්මක කිරීමට ගිය පොලිස් නිලධාරියෙකුට දරුණු ලෙස පහර දී ඔහුගේ එක් ඇසක් අන්ධ කර, දත් 11ක් කඩා දමමින් ඝාතනය කිරීමට තැත් කළ නඩුවකට වරදකරු වූ ප්‍රධාන විත්තිකරු මේ වන විට අධිකරණය මඟහැර පළාගොස් සිටින බව වාර්තා වේ.
මෙලෙස සැඟවී සිටින්නේ කොබෙයිගනේ විවිධ සේවා සමුපකාර සමිතියේ හිටපු සභාපතිවරයා වූ ආර්. ඒ. සිසිර කුමාර රාමනායක නමැත්තාය. ඔහුව වහාම අත්අඩංගුවට ගෙන අධිකරණයට ඉදිරිපත් කිරීමට වයඹ පළාත්බද මහාධිකරණ විනිසුරු ටිකිරි ජයතිලක මහතා විසින් නිකවැරටිය කොට්ඨාස භාර ජ්‍යෙෂ්ඨ පොලිස් අධිකාරිවරයා වෙත විවෘත වරෙන්තුවක් නිකුත් කර ඇත.
දැදුරුඔයේ වැලි වැටලීමේදී සිදුවූ දේ
මෙම අපරාධය සිදුව ඇත්තේ මීට වසර ගණනාවකට පෙර, එනම් 2006 වසරේ මාර්තු මස 03 වැනිදාය. එවකට රස්නායකපුර පොලිසියේ ස්ථානාධිපතිවරයා ලෙස රාජකාරි කළ පොලිස් පරීක්ෂක ප්‍රදීප් කරුණාධීර මහතා දැදුරුඔයේ සිදුවූ නීතිවිරෝධී වැලි ජාවාරමක් වැටලීමට ගොස් තිබේ.
එහිදී වැලි ජාවාරම්කරුවන් අත්අඩංගුවට ගැනීමට සූදානම් වූ අවස්ථාවේදී ඔවුන් ස්ථානාධිපතිවරයා ඉලක්ක කර බරපතළ පහරදීමක් සිදු කර ඇත. මෙම ප්‍රහාරයෙන් නිලධාරියාගේ දත් 11ක් කැඩී ගොස් එක් ඇසක් මුළුමනින්ම අන්ධ විය.
සැකකරුවන්ට ලැබුණු දඬුවම්
දීර්ඝ නඩු විභාගයකින් පසුව ප්‍රධාන විත්තිකරු වන සිසිර කුමාර රාමනායකට වසර 5ක බරපතළ වැඩ සහිත සිරදඬුවමක් නියම විය. ඊට අමතරව හයවැනි විත්තිකරුගේ සිට නවවැනි විත්තිකරු දක්වා වූ සිවුදෙනාට වසර 4 බැගින් ද, අනෙක් විත්තිකරුවන්ට වසර 2 බැගින් ද බරපතළ වැඩ සහිත සිරදඬුවම් නියම කෙරිණි.
මෙසේ දඬුවම් ලැබූවන් අතර කොබෙයිගනේ ප්‍රාදේශීය සභාවේ එවකට හිටපු උප සභාපති ඒ. මහින්ද කුමාරසිරි ද සිටියි. ඊට අමතරව කේ.පී. සමන්සිරි, එන්.එම්. බුද්ධික ප්‍රසාද්, කේ.ඒ. නිලන්ත සමන් කුමාර, ප්‍රියන්ත කුමාර, එල්. ඉන්දික නුවන් සම්පත්, පී.එම්. නිමල් සිරිවර්ධන, ආර්.එම්. රංජන් රාමනායක, ආර්. එම්. ජයලත් ප්‍රදීප් කුමාර, ඒ.එල්. රාමනායක, එස්. එම්. සුනිල් ප්‍රියන්ත, එල්. ලලිත් ප්‍රේමකුමාර, එස්. ඒ. නිලන්ත සමරතුංග, එල්. අජන්ත සමරවීර, එස්. ඒ. නිලන්ත සමරවීර, එස්. ඒ. ලක්ෂ්මන්, ඒ. අසංක ඉන්ද්‍රජිත් සහ වර්ණකුලසූරිය අනිල් ක්‍රිෂාන්ත යන අය ද වෙති.
ඊළඟට කුමක්ද?
වයඹ පළාත්බද මහාධිකරණය නිකුත් කළ විවෘත වරෙන්තුවට අනුව සැඟව සිටින හිටපු සභාපතිවරයා අත්අඩංගුවට ගෙන අධිකරණයට ඉදිරිපත් කිරීමේ මෙහෙයුම් නිකවැරටිය ජ්‍යෙෂ්ඨ පොලිස් අධිකාරිවරයාගේ ප්‍රධානත්වයෙන් සිදුවේ.
