கிரீஸில் அனிருத், காவ்யா மாறன் திருமணம் கோலாகலமாக நடைபெற்றது

அனிருத் ரவிச்சந்தர் மற்றும் காவ்யா மாறன் ஆகியோரின் திருமண புகைப்படங்கள் தற்போது சமூக ஊடகங்களிலும் இந்திய ஊடகங்களிலும் பரவலாக வெளியாகியுள்ளன. நவம்பர் 11 ஆம் திகதி (11.11.2026) கிரீஸில் இந்தத் திருமண நிகழ்வு மிகவும் பிரம்மாண்டமாக நடைபெற்றது.

திருமணத்தின் போது அனிருத் தந்த நிற பாரம்பரிய குர்தா, வேஷ்டி மற்றும் நுணுக்கமான வேலைப்பாடுகள் கொண்ட நீண்ட அங்கியையும், காவ்யா மெல்லிய இளஞ்சிவப்பு நிற அழகிய லெஹெங்காவையும் பெறுமதியான ஆபரணங்களையும் அணிந்திருந்தனர்.

முக்கிய அம்சங்கள்

திருமணம் நவம்பர் 11 ஆம் திகதி (11.11.2026) கிரீஸில் நடைபெற்றது.
சூப்பர் ஸ்டார் ரஜினிகாந்த், தமிழ்நாட்டின் முன்னாள் முதலமைச்சர் மு.க. ஸ்டாலின் உள்ளிட்ட பல முக்கிய பிரமுகர்கள் இதில் கலந்துகொண்டனர்.
திருமண வரவேற்பு நிகழ்வு நவம்பர் 21 ஆம் திகதி சென்னையில் நடைபெறவுள்ளது.

பிரமுகர்களின் பங்கேற்பும் சென்னை வரவேற்பு நிகழ்வும்

கிரீஸில் நடைபெற்ற நிகழ்வில் இந்திய திரையுலக மற்றும் அரசியல் துறை சார்ந்த முக்கிய பிரமுகர்கள் கலந்துகொண்டனர். அவர்களுள் சூப்பர் ஸ்டார் ரஜினிகாந்த் தனது குடும்பத்தினருடனும், தமிழ்நாட்டின் முன்னாள் முதலமைச்சர் மு.க. ஸ்டாலின் தனது குடும்பத்தினருடனும் வருகை தந்திருந்தனர்.

புதுமணத் தம்பதியரின் திருமண வரவேற்பு நிகழ்வு எதிர்வரும் நவம்பர் 21 ஆம் திகதி சென்னையில் நடைபெறவுள்ளதாக காவ்யாவின் பெற்றோரான கலாநிதி மாறன் மற்றும் காவேரி மாறன் தெரிவித்துள்ளனர். இந்நிகழ்விற்காக இந்தியப் பிரதமர் நரேந்திர மோடி, காங்கிரஸ் தலைவர்களான சோனியா காந்தி, ராகுல் காந்தி, பிரியங்கா காந்தி மற்றும் தமிழ்நாட்டின் முதலமைச்சர் சி. ஜோசப் விஜய், தெலுங்கானா முதலமைச்சர் ஏ. ரேவந்த் ரெட்டி, ஆந்திரப் பிரதேச முதலமைச்சர் சந்திரபாபு நாயுடு, நிதி அமைச்சர் நிர்மலா சீதாராமன் உள்ளிட்ட பலருக்கு அழைப்பு விடுக்கப்பட்டுள்ளது.

மேலும் ஏ.ஆர். ரஹ்மான், கமல்ஹாசன், தனுஷ், அஜித் குமார், அல்லு அர்ஜுன், சிவகார்த்திகேயன் போன்ற முன்னணி திரை நட்சத்திரங்களும், துடுப்பாட்ட வீரர்களான அபிஷேக் சர்மா, இஷான் கிஷன் ஆகியோரும் சென்னை நிகழ்வில் கலந்துகொள்ளவுள்ளனர்.

"எனது வாழ்நாளில் ஒருமுறை மட்டுமே கிடைக்கும், வாழ்நாள் முழுமைக்குமான பந்தம் 11.11" அனிருத்

இருவரது பின்னணி

'வை திஸ் கொலவெறி டி' பாடல் மூலம் உலகளவில் கவனம் ஈர்த்த அனிருத், தற்போது ஷாருக் கான், ரஜினிகாந்த், விஜய் போன்ற முன்னணி நடிகர்களின் திரைப்படங்களுக்கு இசையமைத்து வருகின்றார். அவரது இசையமைப்பில் உருவான 'ஜெயிலர் 2' திரைப்படமும் உலகளவில் திரையிடப்பட்டு வருகின்றது.

பிரித்தானியாவின் வார்விக் வர்த்தகப் பாடசாலையில் (Warwick Business School) பட்டம் பெற்ற காவ்யா மாறன், சன் டிவி நெட்வொர்க்கின் இயக்குநராகவும் உள்ளார். 2025 ஆம் ஆண்டு முதல் இவர்கள் இருவரது காதல் தொடர்பாக பேசப்பட்டு வந்த நிலையில், கடந்த ஜூன் மாதம் அனிருத்தின் மாமாவான மூத்த நடிகர் வை.ஜி. மகேந்திரன் இவர்களது திருமணம் உறுதியாக நடைபெறும் என ஊடகங்களுக்குத் தெரிவித்திருந்தார்.