கொழும்பு பல்கலைக்கழகத்தின் முகாமைத்துவ மற்றும் நிதியியல் பீடத்தின் தொழில்முனைவு மற்றும் சிறு வணிக முகாமைத்துவ உயர் டிப்ளோமா 2022/2023 பாடநெறி தொடர்பான ஆவணங்களை நீதிமன்றத்தில் சமர்ப்பிப்பதற்காக அழிக்காமல் பாதுகாக்குமாறு அதிகாரிகளுக்கு உத்தரவிடுமாறு குறித்த பாடநெறியைப் பயின்ற மாணவர் ஒருவர் நுகேகொட மாவட்ட நீதிபதியிடம் கோரிக்கை விடுத்துள்ளார்.
பரீட்சை முறைகேடுகள் காரணமாக தனது நேரம், உழைப்பு மற்றும் பணம் வீணடிக்கப்பட்டதாகக் கூறி, சனத் குமார அத்துகோரல என்ற மாணவரால் கொழும்பு பல்கலைக்கழக நிர்வாகத்திடம் 50 இலட்சம் ரூபா இழப்பீடு கோரி வழக்குத் தாக்கல் செய்யப்பட்டுள்ளது. வழக்கு விசாரணைக்கு எடுத்துக்கொள்ளப்பட்ட போது அவரது சட்டத்தரணி தனோஷா பெரேரா இந்த கோரிக்கையை முன்வைத்தார்.
வழக்குத் தொடரப்பட்டுள்ள தரப்பினரும் குற்றச்சாட்டுகளும்
கொழும்பு பல்கலைக்கழகத்தின் முகாமைத்துவ மற்றும் நிதியியல் பீடத்தின் விரிவுரையாளர்களான டி.சி.எல். தியகுஆரச்சி, டபிள்யூ.பி. பிரேமரத்ன, துறைத் தலைவர் சஷிகா அபேதீர மனோரத்ன, பீடாதிபதி எச்.எம். நிஹால் ஹேன்னாயக்க, பரீட்சைகள் பிரிவின் மேலதிக பதிவாளர் வஜிரா ஹபுஹின்ன ஜயரத்ன, முன்னாள் உபவேந்தர் எச்.டி. கருணாரத்ன, உபவேந்தர் இந்திக மஹேஷ் கருணாதிலக்க ஆகிய அதிகாரிகளுக்கும் சட்டமா அதிபருக்கும் எதிராக இந்த வழக்குத் தாக்கல் செய்யப்பட்டுள்ளது.
பாடநெறியின் முதலாவது பருவத்தில் எவ்வித பிரச்சினைகளும் ஏற்படவில்லை எனவும், இரண்டாவது பருவத்தில் 508 ஆவது பாடமான 'சிறு வணிகங்களுக்கான செயற்பாட்டு முகாமைத்துவம்' மற்றும் 510 ஆவது பாடமான 'வணிக உத்திகள் மற்றும் நிலைபேறுதன்மை' ஆகிய பாடங்களில் தனக்கு பெரும் அநீதி இழைக்கப்பட்டதாகவும் மாணவர் தனது முறைப்பாட்டில் சுட்டிக்காட்டியுள்ளார்.
