மோட்டார் போக்குவரத்து திணைக்களத்தினால் வழங்கப்படும் சேவைகள் மேலும் விரிவுபடுத்தப்பட்டுள்ளதாக அறிவிக்கப்பட்டுள்ளது. புதிய வாகனப் பதிவு, உரிமை மாற்றம், சாரதி அனுமதிப்பத்திரம் மற்றும் தொழில்நுட்ப சிக்கல்களுக்கு தீர்வு காணுதல் உள்ளிட்ட பல சேவைகளை இதன் மூலம் பெற்றுக்கொள்ள முடியும் எனத் தெரிவிக்கப்படுகிறது. எவ்வாறாயினும், ஒருநாள் சேவைகளைப் பெற்றுக்கொள்ள வருகை தரும் நபர்கள் முன்கூட்டியே திகதியையும் நேரத்தையும் ஒதுக்குவது கட்டாயமாகும்.
முக்கிய விடயங்கள்
- ஒருநாள் சேவைகளைப் பெறுவதற்கு முன்கூட்டியே நேரம் ஒதுக்குவது கட்டாயமாக்கப்பட்டுள்ளது.
- தொலைபேசி அழைப்புகள் மூலமாகவோ அல்லது dmtappointments.dmt.gov.lk என்ற இணையத்தளம் மூலமாகவோ நேரங்களை ஒதுக்கிக்கொள்ள முடியும்.
- சாதாரண சேவைகளுக்கு முன்கூட்டியே நேரம் ஒதுக்க வேண்டிய அவசியமில்லை.
- இந்த அலுவலகங்கள் மூலம் புதிதாக பதிவு செய்யப்படுவது மோட்டார் சைக்கிள்கள் மட்டுமேயாகும்.
நேரத்தை ஒதுக்குவதற்கான தொலைபேசி இலக்கங்கள்
சேவைகளுக்கான நேரத்தை ஒதுக்குவதற்கு dmtappointments.dmt.gov.lk என்ற இணையத்தளத்தைப் பயன்படுத்த முடியும். இதற்கு மேலதிகமாக சம்பந்தப்பட்ட பிரதேசங்களுக்கு அமைய சில தொலைபேசி இலக்கங்களும் அறிமுகப்படுத்தப்பட்டுள்ளன.
கொழும்புக்கு 0112 117 116, கம்பஹாவுக்கு 0332 117 116, குருநாகலுக்கு 0372 117 116, அம்பாந்தோட்டைக்கு 0472 117 116, அநுராதபுரத்துக்கு 0252 117 116 மற்றும் யாழ்ப்பாணத்துக்கு 0212 117 116 ஆகிய தொலைபேசி இலக்கங்கள் ஊடாக நேரங்களை ஒதுக்கிக்கொள்ள முடியும்.
சாதாரண சேவைகளுக்கு முன்பதிவு தேவையில்லை
இந்த அலுவலகங்கள் ஊடாக புதிதாக பதிவு செய்யப்படுவது மோட்டார் சைக்கிள்கள் மட்டுமே என திணைக்களம் தெரிவித்துள்ளது. அத்துடன், சாதாரண சேவைகளைப் பெற்றுக்கொள்வதற்கு முன்கூட்டியே நேரம் ஒதுக்க வேண்டிய தேவை இல்லை எனவும் குறிப்பிடப்பட்டுள்ளது.
வழமை போன்று வாகன உரிமை மாற்றத்திற்கான ஆவணங்களை நாராஹேன்பிட்டியில் உள்ள பிரதான அலுவலகத்திற்கு மேலதிகமாக, மாவட்ட செயலகங்களில் அமைந்துள்ள மோட்டார் போக்குவரத்து திணைக்களத்தின் மாவட்ட அலுவலகங்கள் மற்றும் பிரதேச செயலகங்கள் ஊடாகவும் கையளிக்க முடியும் என அறிவிக்கப்பட்டுள்ளது.
இதையும் படியுங்கள்
- இன்று பல மாகாணங்களில் 100 மில்லிமீற்றருக்கும் அதிகமான பலத்த மழை
- அநுராதபுரம் அபிவிருத்தி திட்டத்திற்கு எதிர்ப்பு தெரிவிப்பது காணிகளை இழந்தவர்களா?
- கொழும்பு பங்குச் சந்தையில் பாரிய எழுச்சி: அனைத்துப் பங்கு விலைச் சுட்டெண் 291 புள்ளிகளுக்கும் மேல் அதிகரிப்பு
