உயர் கல்வி நடவடிக்கைகளுக்காக முதன்முறையாக பெலாரஸ் செல்லும் இலங்கை மாணவர்களிடம் அறவிடப்படும் வருகை விசா (entry visa) கட்டணத்தை விலக்களிக்க அந்நாட்டு அரசாங்கம் தீர்மானித்துள்ளதாக தெரிவிக்கப்படுகிறது.
வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் கடந்த மே மாதம் அந்நாட்டிற்கு மேற்கொண்ட உத்தியோகபூர்வ விஜயத்தின் பிரதிபலனாகவே இந்நடவடிக்கை எடுக்கப்பட்டுள்ளதாக வெளிவிவகார அமைச்சு தெரிவித்துள்ளது.
முக்கிய விடயங்கள்
- முதன்முறையாக கல்விக்காக பெலாரஸ் செல்லும் மாணவர்களுக்கு வருகை விசா கட்டணம் இலவசம்.
- வெளிவிவகார அமைச்சர் விஜித ஹேரத் கடந்த மே மாதம் மேற்கொண்ட விஜயத்தின் பிரதிபலனாக இத்தீர்மானம் எடுக்கப்பட்டுள்ளது.
- அந்நாட்டில் உள்ள மாணவர்களின் குடும்பத்தினருக்கான விசா நடைமுறைகளையும் இலகுபடுத்த நடவடிக்கை.
குடும்பத்தினருக்கும் கிடைக்கும் நிவாரணம்
இது தவிர, பெலாரஸில் கல்வி பயிலும் இலங்கை மாணவர்களின் குடும்ப உறுப்பினர்கள் அந்நாட்டிற்கு வருகை தருவதற்கான விசா பெறும் நடைமுறையை மேலும் எளிதாக்குவதற்கு தேவையான நடவடிக்கைகளும் தற்போது ஆரம்பிக்கப்பட்டுள்ளன.
இதன் மூலம் பெலாரஸ் நாட்டில் உயர் கல்வி கற்க எதிர்பார்க்கும் இலங்கை மாணவர்களுக்கும், ஏற்கனவே அங்குள்ள மாணவர்களின் குடும்பங்களுக்கும் பாரிய நிவாரணம் கிடைக்கும் என்று வெளிவிவகார அமைச்சு மேலும் குறிப்பிட்டுள்ளது.
