மணிலாவிலுள்ள இலங்கைத் தூதுவருக்கு அந்நாட்டின் உயரிய விருது வழங்கி கௌரவிக்கப்பட்டுள்ளது. பதவிக்காலம் நிறைவுறும் தூதுவர் சானக்க தல்பஹேவவுக்கு பிலிப்பைன்ஸ் ஜனாதிபதி பேர்டினண்ட் ஆர். மார்கோஸ் ஜூனியர், 'கிராண்ட் கிராஸ்' தரம் கொண்ட ‘ஆர்டர் ஆஃப் சிகத்துனா’ விருதை வழங்கினார்.
2026 ஒக்டோபர் 28 அன்று மலக்கானியாங் அரண்மனையில் தல்பஹேவ விடைபெறும் சந்திப்பை மேற்கொண்டபோதே இந் நிகழ்வு இடம்பெற்றதாக பிலிப்பைன்ஸிலுள்ள இலங்கைத் தூதரகம் தெரிவித்துள்ளது. 1953 இல் நிறுவப்பட்ட இந்த விருது, பிலிப்பைன்ஸின் இராஜதந்திர சிறப்புக்கான தேசிய கௌரவமாகும்.
அரசியல் மற்றும் உயர்மட்ட மைல்கற்கள்
தனது பணிக்காலத்தில், இரு நாடுகளுக்கும் இடையிலான உறவுகளை வலுப்படுத்த தூதுவர் தல்பஹேவ பாடுபட்டார். ஐந்து ஆண்டுகளாக இடைநிறுத்தப்பட்டிருந்த இருதரப்பு அரசியல் ஆலோசனைகளை மீண்டும் ஆரம்பித்தமை இதில் ஒரு முக்கிய சிறப்பம்சமாகும்.
அவரது கண்காணிப்பின் கீழ் உயர்மட்ட தொடர்புகளும் வலுவடைந்தன. இலங்கை பிரதமர் ஹரிணி அமரசூரிய மற்றும் வெளிவிவகார அமைச்சர் விஜித ஹேரத் ஆகியோரின் உத்தியோகபூர்வ விஜயங்களை பிலிப்பைன்ஸ் ஏற்று நடத்தியது.
வர்த்தகம், விசா மற்றும் கலாசார நடவடிக்கைகள்
தல்பஹேவ முக்கிய பொருளாதார நகர்வுகளையும் முன்னெடுத்தார். இலங்கை நிறுவனங்கள் பிலிப்பைன்ஸில் தமது முதலாவது உற்பத்தி முதலீடுகளை மேற்கொள்ள அவர் உதவினார். மேலும், சர்வதேச அளவில் அங்கீகரிக்கப்பட்ட இரண்டு இலங்கை வர்த்தக நாமங்களை உள்ளூர் சந்தைக்கு கொண்டு வந்தார்.
சமூக நலன் கருதி, பிலிப்பைன்ஸ் பிரஜைகளை திருமணம் செய்த இலங்கையர்களுக்கு ஐந்து வருட தற்காலிக வதிவிட விசா திட்டத்தை அவர் பேச்சுவார்த்தை மூலம் பெற்றுக்கொடுத்தார். அத்துடன், அந்நாட்டில் முதலாவது இலங்கை கௌரவத் தூதரகத்தை அமைத்தல், இலங்கையிலிருந்து முதலாவது புனித அரும்பொருட்களின் கண்காட்சி மற்றும் முதல் கூட்டு அஞ்சல் தலைகளுக்கான திட்டங்கள் என்பனவும் அவரது பணிக்காலத்தில் இடம்பெற்றன.
