2026 නොවැම්බර් 5 වැනි බ්‍රහස්පතින්දා පස්වරු 3.00 ට පමණ ඩුබායි හි අල් රෂීඩියා ප්‍රදේශයේ අල් ඛවානීජ් වීදියේදී මෙම අනපේක්ෂිත අනතුර සිදුවිය. මියගොස් ඇත්තේ ඩුබායි හි කැනේඩියන් විශ්වවිද්‍යාලයේ (CUD) වාස්තු විද්‍යාව හදාරමින් සිටි 21 හැවිරිදි අවසන් වසරේ සිසුවියක වූ නයිෆා බල්කීස් හමීඩ් ය. ඉන්දියාවේ කේරළයේ තොඩුපුළා ප්‍රදේශයේ උපන් ඇය පවුලේ බාල දරුවා වූ අතර, පවුලේ අය ඇයව ආදරයට හැඳින්වූයේ 'නූන්' හෝ 'නූනි' යනුවෙනි. ඇගේ මිතුරියක ඇයට 'ෂුක්කු' යනුවෙන් ආමන්ත්‍රණය කර ඇත.
විවාහ මංගල්‍යයක් සඳහා ඇගේ පියා වන බිනු හමීඩ්, මව සීනා ඇතුළු පිරිස කේරළයට ගොස් සිටියත්, දේශන මඟහැරෙනු ඇතැයි සිතා නයිෆා මව සමඟ කලින්ම යළි ඩුබායි වෙත පැමිණ තිබුණි. අනතුර වූ දින ඇය ගමන් කර ඇත්තේ කේරළයේ රැඳී සිටි සිය සොහොයුරු නිහාල් හමීඩ්ට අයත් මෝටර් රථයෙනි. දින කිහිපයකින් භාවිත නොකළ එම රථයේ එක් ටයරයක හුළං බැසයාම නිසා ඇය අතරමඟ නතර වී තිබේ.
පියා දුන් උපදෙස සහ අනතුර
වයස අවුරුදු 18 සිටම රිය ධාවනය කර පළපුරුදු නයිෆා, වහාම කේරළයේ සිටි පියා අමතා මේ ගැන පවසා ඇත. මාර්ගස්ථ සහාය සේවාවක් අමතා රථය රැගෙන යාමට සලස්වා, කුලී රථයකින් සරසවියට යන ලෙස පියා ඇයට පවසා තිබේ. එහෙත් මිනිත්තු පහකට පමණ පසු පියා යළි ඇමතුමක් ගත්තද ප්‍රතිචාරයක් ලැබී නැත.
පසුව ඩුබායි පොලිසිය පවුලේ අයට දැනුම් දී ඇත්තේ, නතර කර තිබූ රථයට පිටුපසින් සිටි ඇයගේ ඇඟේ වේගයෙන් පැමිණි වෙනත් වාහනයක් ගැටී එම ස්ථානයේදීම මියගොස් ඇති බවයි. අනතුර සිදුකළ රියදුරා අත්අඩංගුවට ගත් බවද පොලිසිය සඳහන් කර තිබේ.
සැමගේ ආදරය දිනූ සිසුවිය
කැනේඩියන් විශ්වවිද්‍යාලයේ ශිෂ්‍ය කටයුතු අංශය ඇයව 'ආදරණීය සිසුවියක' ලෙස හඳුන්වමින් ශෝක පණිවිඩයක් නිකුත් කර තිබුණි. එහි මහාචාර්ය සංජීව පුෂ්පකුමාර මහතා ප්‍රකාශ කළේ, ඇය ඉතා නිහඬ මෙන්ම අධ්‍යාපනය කෙරෙහි දැඩි අවධානයක් යොමු කළ තැනැත්තියක වූ බවයි.
නොවැම්බර් 6 වැනිදා පවුලේ අය යළි ඩුබායි පැමිණි අතර, සෙනසුරාදා එම්බාම් කිරීමේ මධ්‍යස්ථානයකදී අවසන් ගෞරව දැක්වීමෙන් පසු දේහය කේරළයට රැගෙන ගොස් නොවැම්බර් 8 ඉරිදා තොඩුපුළා මුස්ලිම් පල්ලියකදී අවසන් කටයුතු සිදුකර තිබේ. පවුලේ අය සහ ඇගේ සොහොයුරාගේ බිරිඳ වන මරියම් ඇතුළු ඥාතීන් ඉල්ලා සිටින්නේ, හදිසියේ නතර කළ වාහන දුටුවිට කල්පනාකාරී වන ලෙසත් නොසැලකිලිමත් ලෙස රිය ධාවනයෙන් වළකින ලෙසත්ය.
