පන්ති කාමරයේ පොතපතට පමණක් සීමා නොවී රටේ ඉතිහාසය, ප්‍රජාතන්ත්‍රවාදී ආයතන සහ රාජ්‍ය පරිපාලන ක්‍රියාවලිය පිළිබඳ සජීවී ප්‍රායෝගික දැනුමක් ලබා දීම වෙනුවෙන් ජනාධිපති ලේකම් කාර්යාලය 'Vision' අධ්‍යාපනික වැඩසටහන ක්‍රියාත්මක කරයි. ඒ යටතේ කෑගලු බාලිකා විද්‍යාලයේ සිසුවියන්ට විශේෂ අධ්‍යාපනික චාරිකාවකට එක්වීමට ඉඩ ලැබිණි.
මෙම වැඩසටහනට සමගාමීව ජනාධිපති ලේකම් කාර්යාලය, ජනාධිපති මන්දිරය මෙන්ම අරලිය ගහ මන්දිරය දැකබලා ගැනීමටත් එම සිසුවියන්ට අනගි අවස්ථාවක් උදා විය.
නායකත්ව දැනුවත් කිරීම සහ සහභාගී වූ පිරිස
අනාගත නායකයන් බිහි කිරීම සහ නායකත්වයට අවශ්‍ය දැනුම, කුසලතා මෙන්ම ආකල්ප වර්ධනය කරගන්නා ආකාරය සම්බන්ධයෙන් මෙහිදී සිසුවියන් දැනුවත් කෙරිණි. එම මඟපෙන්වීම සිදු කරන ලද්දේ ජනාධිපති ජ්‍යෙෂ්ඨ අතිරේක ලේකම් ප්‍රසන්න චන්දිත් මහතා විසිනි.
මෙම අවස්ථාවට ජනාධිපති මහජන සම්බන්ධතා අධ්‍යක්ෂ ජනරාල් ධර්මසිරි ගමගේ, ජනාධිපති මාධ්‍ය උපදේශක ජ්‍යෙෂ්ඨ මාධ්‍යවේදී චන්දන සූරියබණ්ඩාර, ජනාධිපති කාර්යාලයේ ත්‍රිවිධ හමුදා සම්බන්ධීකරණ ඒකකයේ සහකාර අධ්‍යක්ෂ ලුතිනන් කර්නල් නදීක දංගොල්ල යන මහත්වරුන් එක්ව සිටියහ. ඊට අමතරව කෑගලු බාලිකා විද්‍යාලයේ විදුහල්පතිනිය එච්. ඒ. ටී. ඩී.කේ. ජයරත්න මහත්මිය ඇතුළු ආචාර්ය මණ්ඩලයේ සහ ආදි ශිෂ්‍ය සංගමයේ සාමාජික පිරිසක්ද මේ සඳහා සහභාගී වූහ.
