அனுராதபுர புதிய அபிவிருத்தி திட்டம் தொடர்பில் இந்த நாட்களில் தீவிர வாதப்பிரதிவாதங்கள் எழுந்துள்ளன. ருவன்வெலிசாய உள்ளிட்ட வரலாற்றுச் சிறப்புமிக்க தாதுகோபுரங்கள் புதையுண்டு போகும் அபாயம் உள்ளதாகவும், புனித நகருக்குள் ஸ்பா மற்றும் மதுபானசாலைகள் அமைக்கப்பட வாய்ப்புள்ளதாகவும் கருத்துக்கள் பகிரப்பட்டு வருகின்றன.
கடந்த ஒக்டோபர் 26 ஆம் திகதி ஊடகவியலாளர் சந்திப்பொன்றை நடத்திய பிவிதுரு ஹெல உறுமயவின் தலைவர் உதய கம்மன்பில, திட்டமிடப்பட்டுள்ள நிலத்தடி நிர்மாணப் பணிகள் காரணமாக பிரதான தாதுகோபுரங்களின் அடித்தளங்களுக்கு சேதம் ஏற்படக்கூடும் என்று தெரிவித்தார். அதேபோன்று ஏனைய மத வழிபாட்டுத் தலங்கள் மற்றும் கோவில்கள் அமைக்கப்படுவதற்கும், பொது சேவை வலயங்களில் ஸ்பாக்கள் மற்றும் மதுபானசாலைகள் உருவாவதற்கும் இது வழிவகுக்கும் என்றும் அவர் குற்றஞ்சாட்டினார்.
முக்கிய அம்சங்கள்
- தாதுகோபுரங்கள் பாதிக்கப்படும் அபாயம் உள்ளதாகவும் ஸ்பாக்கள் அமையும் என்றும் உதய கம்மன்பில குற்றச்சாட்டு
- வர்த்தமானி அறிவித்தல் தவறாக புரிந்துகொள்ளப்பட்டுள்ளதாக தேசிய பௌதிக திட்டமிடல் திணைக்களம் தெரிவிப்பு
- கம்மன்பிலவுக்கு எதிராக குற்றப் புலனாய்வுத் திணைக்களத்தில் முறைப்பாடு
- எதிர்ப்புகளுக்குப் பின்னால் சட்டவிரோத குடியிருப்பாளர்களின் காணிகளை பாதுகாக்கும் முயற்சி உள்ளதாக குற்றச்சாட்டு
அரசின் தெளிவுபடுத்தலும் சிஐடி முறைப்பாடும்
எவ்வாறாயினும், இந்த கூற்றுக்கள் வர்த்தமானி அறிவித்தலை தவறாக புரிந்துகொண்டதன் விளைவு என தேசிய பௌதிக திட்டமிடல் திணைக்களம் (NPPD) சுட்டிக்காட்டியுள்ளது. புதிய மத வழிபாட்டுத் தலங்களை அமைப்பதற்கோ அல்லது பக்தர்களுக்கு இடையூறு விளைவிப்பதற்கோ இந்த திட்டத்தில் நோக்கம் கொண்டிருக்கவில்லை என அத்திணைக்களம் வெளியிட்டுள்ள அறிக்கையில் தெரிவிக்கப்பட்டுள்ளது.
இதேவேளை, மத ரீதியான அமைதியின்மையை ஏற்படுத்தி பொது அமைதிக்கு பங்கம் விளைவிக்க இவ்வாறான கருத்துக்கள் வழிவகுக்கும் எனக் கூறி, தேசிய புத்திஜீவிகள் அமைப்பின் அனுராதபுர மாவட்ட செயற்பாட்டாளர் உபாலி ரத்நாயக்க மற்றும் ரஜரட்ட பல்கலைக்கழக குரல் அமைப்பின் செயற்பாட்டு உறுப்பினர் தீபால் திலகரத்ன ஆகியோர் உதய கம்மன்பிலவுக்கு எதிராக குற்றப் புலனாய்வுத் திணைக்களத்தில் (CID) முறைப்பாடு ஒன்றையும் பதிவு செய்துள்ளனர்.
எதிர்ப்புகளுக்குப் பின்னாலுள்ள உண்மை நிலை
புனித நகரத்திலிருந்து இரண்டு அல்லது மூன்று கிலோமீட்டர் தொலைவில் அமைந்துள்ள சங்கமித்தா மாவத்தை மற்றும் அநுலா மாவத்தை ஆகிய பகுதிகளை அண்டிய தொல்பொருள் எச்சங்களை நவீன தொழில்நுட்பத்தைப் பயன்படுத்தி அகழ்ந்தெடுத்து வெளிக்கொணர்வதே இத்திட்டத்தின் முக்கிய நோக்கங்களில் ஒன்றாகும். இப்பகுதியில் கி.மு. 300 இற்கும் முற்பட்ட வரலாற்று தொல்பொருள் பெறுமதிகள் காணப்படுவதாக தெரிவிக்கப்படுகிறது.
எனினும், பண்டைய நகர மதில்களைச் சுற்றி சட்டவிரோதமாக வீடுகளை அமைத்து தங்கியுள்ள தரப்பினர், தங்களின் காணிகளை இழக்க நேரிடும் என்ற அச்சத்திலேயே இந்த எதிர்ப்புகளுக்குப் பின்னால் செயல்படுவதாக குற்றச்சாட்டு எழுந்துள்ளது. கடந்த அரசாங்கங்களின் ஆட்சிக் காலத்தில் அரசியல்வாதிகளின் தலையீட்டால் அனுமதிப்பத்திரங்களை பெற்றுக்கொண்ட சிலரும், மோசடிக்காரர்களும் இந்த வரலாற்று ரீதியான ஆய்வுகளை சீர்குலைக்க முனைவதாகவும் தகவல்கள் தெரிவிக்கின்றன.
இதையும் படியுங்கள்
- இலங்கையர்கள் சுமார் 4 மில்லியன் பேருக்கு இன்னும் வரி அடையாள எண் (TIN) இல்லை என உள்நாட்டு இறைவரித் திணைக்களம் தெரிவிப்பு
- உலப்பனே சுமன தேரர் மிகிந்தலை கட்டுசாய அருகே சத்தியாக்கிரகத்திற்கு தயார்
- ஜனாதிபதி அநுர குமார திசாநாயக்கவினால் தேசிய உற்பத்தித்திறன் விருதுகள் வழங்கி வைப்பு
