2018 முதல் 2021 வரையிலான காலப்பகுதியில் கல்வி, உயர்கல்வி மற்றும் தொழிற்கல்வி அமைச்சினால் ஆரம்பிக்கப்பட்ட 72 அபிவிருத்தித் திட்டங்கள் பாதியில் கைவிடப்பட்டுள்ளதாக அரசாங்கக் கணக்குகள் பற்றிய குழுவில் (கோபா) தெரியவந்துள்ளது. நாடாளுமன்ற உறுப்பினர் கபீர் ஹாசிம் தலைமையில் கடந்த 19 ஆம் திகதி நாடாளுமன்றத்தில் இக்குழு கூடியபோதே இந்த விடயங்கள் முன்வைக்கப்பட்டன.
இவ்வாறு பாதியில் கைவிடப்பட்ட 72 திட்டங்களுக்காக 1,664 மில்லியன் ரூபா நிதி செலவிடப்பட்டுள்ளதாக அங்கு தெரியவந்தது. இவற்றில் 35 திட்டங்கள் தற்போது நிறைவடைந்துள்ளதுடன், 13 திட்டங்களின் பணிகள் முன்னெடுக்கப்பட்டு வருகின்றன. இருப்பினும், ஒப்பந்தப் பிரச்சினைகள் காரணமாக 20 திட்டங்கள் இடைநிறுத்தப்பட்டுள்ளதுடன் மேலும் 4 திட்டங்கள் தற்காலிகமாக நிறுத்தி வைக்கப்பட்டுள்ளதாக அதிகாரிகள் குறிப்பிட்டனர்.
முக்கிய விடயங்கள்
- 2018 முதல் 2021 வரை ஆரம்பிக்கப்பட்ட 72 திட்டங்களுக்காக 1,664 மில்லியன் ரூபா செலவிடப்பட்டுள்ளது.
- ஒப்பந்தப் பிரச்சினைகளால் 20 திட்டங்கள் தடைப்பட்டுள்ளதுடன், மேலும் 4 திட்டங்கள் நிறுத்தி வைக்கப்பட்டுள்ளன.
- தரமற்ற கணினித் தொகையை பொறுப்பேற்காததால் விநியோகஸ்தர் நீதிமன்றில் வழக்குத் தொடர்ந்துள்ளார்.
தேசிய பாடசாலைகள் திட்டமும் கணினி வழக்கும்
2019 ஆம் ஆண்டில் ஒரு பிரதேச செயலகப் பிரிவிற்கு மூன்று வீதம் தேசிய பாடசாலைகளை அமைக்கும் திட்டத்திற்காக சுமார் 1,600 மில்லியன் ரூபா நிதி வழங்கப்பட்டிருந்தது. எனினும், கொள்கைத் தீர்மானங்கள் காரணமாக அத்திட்டம் இடைநிறுத்தப்பட்டுள்ளதால், ஒவ்வொரு பாடசாலைக்கும் வழங்கப்பட்ட நிதி மற்றும் முன்னெடுக்கப்பட்ட பணிகள் குறித்த அறிக்கையை சமர்ப்பிக்குமாறு குழு அறிவுறுத்தியது.
இதேவேளை, அமைச்சினால் கொள்வனவு செய்யக் கோரப்பட்ட கணினித் தொகுதி ஒன்று தொழில்நுட்ப விவரக்குறிப்புகளுக்கு அமைவாக இல்லாததால் பொறுப்பேற்கப்படவில்லை எனவும், அதற்கான நிதி செலுத்தப்படாத நிலையில் விநியோகஸ்தரால் நீதிமன்றில் இரண்டு வழக்குகள் தொடரப்பட்டுள்ளதாகவும் அங்கு தெரியவந்தது.
NEMIS கட்டமைப்பும் எழுந்துள்ள தடைகளும்
தேசிய கல்வி முகாமைத்துவ தகவல் கட்டமைப்பு (NEMIS) ஊடாக ஆசிரியர் விபரங்கள் மற்றும் மாணவர்களின் மதிப்பீட்டுத் தரவுகளை உள்ளிடுவதற்கு முன்னுரிமை வழங்கப்பட்டுள்ளதுடன், பல மாகாணங்களில் ஆசிரியர் இடமாற்றங்கள் தற்போது அதன் ஊடாகவே இடம்பெறுவதாகவும் தெரிவிக்கப்பட்டது. இக்கட்டமைப்பை அனைத்து மாகாணங்களுக்கும் தேசிய பாடசாலைகளுக்கும் விரிவுபடுத்த திட்டமிடப்பட்டுள்ளது.
மதிப்பீட்டுத் தாமதங்கள், தொழில்நுட்ப உத்தியோகத்தர்களின் பற்றாக்குறை மற்றும் கேள்விப்பத்திரப் பிரச்சினைகள் மூலதன ஒதுக்கீடுகளைப் பயன்படுத்துவதில் தடையாக அமைந்துள்ளன எனவும், கணக்காய்வு வினாக்களுக்கான தாமதங்களை உடனடியாகத் தீர்க்க நடவடிக்கை எடுக்குமாறு குழு அறிவுறுத்தியுள்ளதாகவும் நாடாளுமன்ற தொடர்பாடல் திணைக்களம் தெரிவித்தது.






