ඉන්දියාවේ අන්දමන් දූපත ආශ්‍රිතව පැවැති ‘බිම්ස්ටෙක් 2026’ ආරක්ෂක යුද අභ්‍යාසය අතරතුර ශ්‍රී ලංකා නාවික හමුදාවට අතිශය කනගාටුදායක පුවතක් අසන්නට ලැබිණි. එම අභ්‍යාසයට ගොස් සිටි නාවික හමුදා කමාන්ඩර් සමීර මදුශංක සමරකෝන් මහතා හදිසියේ අසනීප වී තිබේ. ඉන්දියාවේ නිකොබාර්, ශ්‍රී විජය පුරම් හි රෝහලක ප්‍රතිකාර ලබමින් සිටියදී ඒ මහතා ජීවිතක්ෂයට පත්ව ඇති බව නාවික හමුදා ආරංචි මාර්ග තහවුරු කරයි.
මෙම අවාසනාවන්ත සිදුවීමට අමතරව එම අභ්‍යාසයට සහභාගී වූ තවත් ශ්‍රී ලාංකික නාවික නිලධාරීන් තිදෙනෙකු ද මේ වන විට අසනීප වී ඇති බව වාර්තා වේ.
දේහය කටුනායකට රැගෙන ඒම
මියගිය කමාන්ඩර් සමීර මහතාගේ දේහය මෙන්ම රෝගාතුර වූ සෙසු නිලධාරීන් තිදෙනා ඉන්දීය ගුවන් හමුදාවට අයත් සී-130 දරන විශේෂ ගුවන් යානයකින් 03 වැනිදා කටුනායක ගුවන්තොටුපළ වෙත රැගෙන එනු ලැබීය. අසනීප තත්ත්වයේ පසුවන නිලධාරීන් තිදෙනා වැඩිදුර ප්‍රතිකාර සඳහා වහාම කොළඹ අයි.ඩී.එච්. රෝහල වෙත ඇතුළත් කර තිබේ.
කළගෙඩිහේන, තිරිවානගම පදිංචිකරුවකු වූ කමාන්ඩර් සමීර මහතා 2006 වසරේ මාර්තු මාසයේදී ශිෂ්‍ය භටයකු ලෙස නාවික හමුදාවට එක්වූවෙකි. ඒ මහතා ඉන්දියාව බලා ගිය ගජබා නෞකාවේ ඉංජිනේරුවරයා ලෙස කටයුතු කර ඇත. මෙම නෞකාව පසුගිය මස 24 වැනිදා ඉන්දියාව බලා පිටත්ව ගොස් තිබිණි. නිකොබාර් හිදී කපිතාන් අශෝක වීරසේකර මහතා ඇතුළු ශ්‍රී ලාංකික සහ ඉන්දීය නාවික නිලධාරීන් දේහයට පූර්ණ ගෞරවාචාර පුද කළහ.
මරණ පරීක්ෂණය සහ හේතුව
මරණයට නිශ්චිත හේතුව මෙතෙක් පැහැදිලි වී නොමැත. කමාන්ඩර්වරයාගේ පශ්චාත් මරණ පරීක්ෂණය පෙරේදා (4) මීගමුව රෝහලේදී සිදු කර ඇත. එහිදී අධිකරණ වෛද්‍යවරයා මරණයට හේතුව ප්‍රකාශ කිරීම පසුවට කල් තැබූ බව පොලිසිය පවසයි.
සිරුරේ කොටස් රජයේ රස පරීක්ෂක දෙපාර්තමේන්තුව වෙත යැවීමට පියවර ගෙන ඇති අතර එම වාර්තාව ලැබුණු පසු හේතුව ප්‍රකාශ කරන බව දන්වා තිබේ. මේ වන විට දේහය සීල් තබා අවසන් කටයුතු සඳහා ඥාතීන් වෙත භාර දී ඇති බව මීගමුව රෝහල් ආරංචි මාර්ග සඳහන් කරයි.
ඊළඟට කුමක්ද?
රජයේ රස පරීක්ෂක දෙපාර්තමේන්තුවේ වාර්තාව ලැබීමෙන් පසු මරණයට නිශ්චිත හේතුව අධිකරණ වෛද්‍යවරයා විසින් පොලිසියට දැනුම් දීමට නියමිතය.
