හදිසි ජල ගැලීම් හේතුවෙන් කෙටි වේලාවකට බාධා එල්ල වූ කොළඹ ජාතික රෝහලේ දෛනික කටයුතු මේ වන විට සාමාන්‍ය තත්ත්වයට පත්ව ඇත. රෝහල් පරිශ්‍රයට ඇදහැලුණු ධාරානිපාත වර්ෂාව හේතුවෙන් කටයුතු කිහිපයකට බාධා එල්ල විය.

කාර්ය මණ්ඩලයෙන් කඩිනම් පිරිසිදු කිරීම්

ජලයෙන් යටවූ ප්‍රදේශ පිරිසිදු කිරීම සඳහා රෝහල් කාර්ය මණ්ඩලය වහා පියවර ගත්හ. පැය කිහිපයක් ඇතුළත සමස්ත පිරිසිදු කිරීමේ කටයුතු අවසන් කිරීමට ඔවුන් සමත් වූ අතර, ඒ අනුව සාමාන්‍ය සේවාවන් කඩිනමින් යථා තත්ත්වයට පත් කෙරිණි.

කොළඹට ඇදහැලුණු තද වැසි

කොළඹ ප්‍රදේශයට ඇදහැලුණු අධික වර්ෂාවත් සමඟ මෙලෙස හදිසි ජල ගැලීම් තත්ත්වයක් නිර්මාණය විය. කාලගුණ විද්‍යා දෙපාර්තමේන්තුවට අනුව පැය කිහිපයක් ඇතුළත මිලිමීටර් 129 ක වර්ෂාපතනයක් වාර්තා වී ඇති අතර, නගරයේ මාර්ග රැසක් සහ පහත් බිම් කිහිපයක් ජලයෙන් යට විය.