2026-2027 ශ්රී පාද වන්දනාවාරය ආරම්භ කිරීම පිළිබඳව රාජ්ය හා පෞද්ගලික අංශ නිලධාරීන් දැනුවත් කිරීමට ඊයේ (18) පස්වරුවේ නල්ලතන්නිය ග්රාමසේවක කාර්යාලයේදී විශේෂ රැස්වීමක් පැවැත්විණි. නුවරඑළිය දිස්ත්රික් ලේකම් තුෂාරි තෙන්නකෝන් මහත්මියගේ ප්රධානත්වයෙන් පැවති මෙම සාකච්ඡාවේදී නාහිමියන් මේ අදහස් පළ කළහ.
නල්ලතන්නිය බෞද්ධ මධ්යස්ථානය අසල සිට රත්නපුර පලාබද්දර ශ්රී පාද තොරණ දක්වා මාර්ගය වනජීවී දෙපාර්තමේන්තුවට අයත් නොවන බව උන්වහන්සේ මෙහිදී පෙන්වා දුන්හ. අවාරයේ පැමිණෙන සමහර දේශීය සංචාරකයන් පරිසරයට හා පොදු දේපළවලට හානි කරන බවත්, වනජීවී දෙපාර්තමේන්තුව මුදල් අයකර ප්රවේශපත්ර ලබාදීම නිසා ඒ සම්බන්ධයෙන් නීතිමය පියවර ගැනීමට බාධා මතුව ඇති බවත් උන්වහන්සේ සඳහන් කළහ.
පූජනීය ස්ථානයක් ලෙස නම් කිරීමට ඉල්ලීමක්
ශ්රී පාදස්ථානය පූජනීය ස්ථානයක් ලෙස නම් කර, මාවත දෙපසට අඩි 20 බැගින් වන සේ ගැසට් කරන ලෙස අවස්ථා කිහිපයකදීම ඉල්ලා සිටියත් එය මෙතෙක් ඉටු වී නැති බවද නාහිමියෝ පැවසූහ. මෙවර වන්දනාවාරය අවසන් වීමට මත්තෙන් ශ්රී පාදස්ථානය පූජනීය ස්ථානයක් ලෙසත්, එම මාර්ගය 'ශ්රී පාදස්ථාන මාවත' ලෙසත් නම් කිරීමට මැදිහත් වන ලෙස රැස්වීමට එක්වූ නුවරඑළිය දිස්ත්රික් පාර්ලිමේන්තු මන්ත්රී මංජුල සුරවීරආරච්චි මහතාගෙන් උන්වහන්සේ ඉල්ලා සිටියහ.
ප්රතිසංස්කරණ සහ සූදානම
දිට්වා සුළි කුණාටුවෙන් මහගිරිදඹ ප්රදේශයේ සිදු වූ නායයෑම සහ පසුගියදා ඇදහැලුණු වර්ෂාවෙන් ඉදිකටු පහණ ප්රදේශයේ වූ නායයෑම් යථා තත්ත්වයට පත්කිරීමට ජනාධිපති අනුර කුමාර දිසානායක මහතා ආරක්ෂක අංශ යොදවා කටයුතු කළ බව නාහිමියෝ සිහිපත් කළහ. වන්දනාකරුවන්ට හා උඩමළුවට නොමිලේ පානීය ජලය ලබාදීමට කළ මැදිහත්වීමද උන්වහන්සේ අගය කළහ.
මේ අතර, නල්ලතන්නිය මාර්ගයේ ඇති බඹර කූඩු වන්දනාවාරයට පෙර ඉවත් කිරීමටත්, නායයෑම් හේතුවෙන් පහළට ආ ගල් හා පස් ඉවත් කර සීතගඟුල ස්නානයට සුදුසු පරිදි සකස් කිරීමටත් මෙම රැස්වීමේදී තීරණය කර ඇත.
ඊළඟට කුමක්ද?
දෙසැම්බර් 21 පස්වරුවේ ගල්පොත්තාවල රජමහා විහාරස්ථානයේ තැන්පත් කර ඇති ධාතු කරඬුව ඇතුළු පූජා භාණ්ඩ එළියට වැඩම කරවීම සිදුවෙයි. දෙසැම්බර් 22 දින පැල්මඩුල්ල ශ්රී පාද රජමහා විහාරයේ සිට පලාබද්දර, එරත්න, රත්නපුර, අවිස්සාවේල්ල සහ හැටන් මාර්ග ඔස්සේ පෙරහැර 04කින් උඩමළුවට වැඩම කරවීමෙන් පසු, දෙසැම්බර් 23 අලුයම පුරාණ චාරිත්ර ඉටුකර වන්දනාවාරය නිල වශයෙන් ඇරඹේ.






