දින දෙකක් පුරා පැවති හයවන බෙංගාල බොක්ක සමුද්‍රීය සංවාදය කොළඹ සිනමන් ග්‍රෑන්ඩ් හෝටලයේදී පැවැත්විණි. බෙංගාල බොක්ක කලාපය මුහුණ දෙන තීරණාත්මක අභියෝගවලට මුහුණ දීම සඳහා කලාපීය විශේෂඥයෝ, රාජ්‍ය තාන්ත්‍රිකයෝ, පර්යේෂකයෝ සහ සමුද්‍රීය වෘත්තිකයෝ ඊට එක්ව සිටියහ.
මෙම සමුළුව ශ්‍රී ලංකාවේ පාත්ෆයින්ඩර් පදනම (Pathfinder Foundation) සහ ස්විට්සර්ලන්තයේ මානුෂීය සංවාද සඳහා වන මධ්‍යස්ථානය (Centre for Humanitarian Dialogue) එක්ව සංවිධානය කරන ලදී. මෙවර සමුළුවේදී හුදු නිර්දේශ ඉදිරිපත් කිරීමට පමණක් සීමා නොවී, ප්‍රායෝගිකව ක්‍රියාත්මක කළ හැකි විසඳුම් කෙරෙහි මූලික අවධානය යොමු වූ බව සංවිධායකයෝ අවධාරණය කළහ.
ආරක්ෂාව, සන්නිවේදන රැහැන් සහ කලාපීය ගැටලු
ගෝලීය සමුද්‍රීය වෙළෙඳාමෙන් හතරෙන් එකක් පමණ බෙංගාල බොක්ක හරහා සිදුවන බැවින්, එය ආර්ථික වශයෙන් අතිශය වැදගත් වේ. කෙසේ වෙතත්, භූ දේශපාලනික තරගකාරිත්වය, නීතිවිරෝධී ධීවර කටයුතු, පාරිසරික විපර්යාස සහ මුහුදු පත්ලේ ඇති තීරණාත්මක යටිතල පහසුකම්වලට එල්ල වන අවදානම් හේතුවෙන් කලාපය තුළ ගැටලුකාරී තත්ත්වයන් වර්ධනය වෙමින් පවතී.
පාත්ෆයින්ඩර් පදනමේ සභාපති විශ්‍රාමික තානාපති බර්නාඩ් ගුණතිලක සහ මානුෂීය සංවාද සඳහා වන මධ්‍යස්ථානයේ විශ්‍රාමික තානාපති වේණු රාජමොනි විසින් ආරම්භක දේශන පවත්වන ලදී. මීට අමතරව බිම්ස්ටෙක් (BIMSTEC) මහලේකම් තානාපති ඉන්ද්‍ර මණි පාණ්ඩේ, ජර්මානු තානාපති ආචාර්ය ෆීලික්ස් නියුමන්, ඉන්දුනීසියාවේ විදේශ කටයුතු පිළිබඳ උප අමාත්‍ය අරිෆ් හවාස් ඔග්‍රොසෙනෝ සහ පාත්ෆයින්ඩර් පදනමේ නිර්මාතෘ මිලින්ද මොරගොඩ යන මහත්වරු ද මෙම සැසියට සහභාගී වූහ.
ප්‍රතිපත්ති ක්‍රියාවට නැංවීම
සමුද්‍රීය සන්නිවේදනය, අර්බුද කළමනාකරණය, මුහුදු පත්ලේ රැහැන් පද්ධතිවල ආරක්ෂාව තහවුරු කිරීම සහ පොදු සාගර කලාප කළමනාකරණය ආදී කරුණු රැසක් පිළිබඳව මෙහිදී සාකච්ඡා කෙරිණි. දෙවන දිනයේදී, ඉන්දීය සාගර කටයුතු පිළිබඳ ඔස්ට්‍රේලියානු විශේෂ නියෝජිත ටිම් වොට්ස් (පා.ම.) මහතාගේ පණිවිඩයක් ද ඉදිරිපත් කෙරුණු අතර, ධීවර පාලනය සහ දේශසීමා ආශ්‍රිත ගැටුම් අවම කරගැනීම පිළිබඳව වැඩි අවධානයක් යොමු විය.
'පිළිගැනීමේ සිට ක්‍රියාත්මක කිරීම දක්වා' යන තේමාව යටතේ පැවති සැසියේදී සහභාගිවන්නන් සමුද්‍රීය ආරක්ෂාව, සහභාගිත්වය මෙන්ම දත්ත සහ විද්‍යා රාජ්‍ය තාන්ත්‍රිකභාවය ආවරණය වන පරිදි කණ්ඩායම් සාකච්ඡාවලට එක්වෙමින් ප්‍රායෝගික ක්‍රියාමාර්ග සකස් කිරීමට දායක වූහ.
ඉදිරි පියවර
මෙම සංවාදයේ ප්‍රතිඵල සහ නිර්දේශ බෙංගාල බොක්ක වෙරළබඩ රටවල රජයන් වෙත සහ කලාපීය සංවිධාන වෙත ඉදිරිපත් කිරීමට නියමිතය.
