පෙර පැවති බදු ප්‍රමාණයටත් වඩා ඉන්ධන බදු වැඩි කර ඇති බවත්, එහි සම්පූර්ණ බර අවසානයේ ජනතාව මත පැටවී ඇති බවත් ශ්‍රීලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ ප්‍රකාශ කර තිබේ. පාර්ලිමේන්තුවේදී මන්ත්‍රීවරුන් පිරිසක් සමඟ පැවති සාකච්ඡාවකදී ඔහු මේ අදහස් පළ කළ බව සඳහන් වේ.
නැවෙන් ගොඩබාන මිලටම ඉන්ධන ලබාදෙන බවට වත්මන් ආණ්ඩුව ප්‍රකාශ කළ බැවින්, අඩුම තරමින් ඉන්ධන මත පනවා ඇති බදු අඩු කිරීමටවත් පියවර ගත යුතු බව මන්ත්‍රීවරයා අවධාරණය කරයි.
ජීවන වියදම සහ ආණ්ඩුවේ විසඳුම්
මේ වන විට අත්‍යවශ්‍ය ආහාර ද්‍රව්‍යවල මිල විශාල ලෙස ඉහළ ගොස් ජනතාවගේ ජීවන වියදම වැඩි වී ඇතත්, ඊට සරිලන අයුරින් වැටුප් වැඩිවීමක් සිදුව නැති බව මන්ත්‍රීවරයා පෙන්වා දෙයි. මේ සඳහා ආණ්ඩුවේ විසඳුම තවත් අලුතින් බද්දක් ගැසීමද, නැතහොත් පරීක්ෂණ පවත්වමින් විපක්ෂය සහ ජනතාව මර්දනය කිරීමද යන්න ඔහු මෙහිදී ප්‍රශ්න කර සිටියි.
ගතවූ වසර දෙකක කාලය තුළ රටේ ජනතාවගේ ජීවන වියදම පාලනය කිරීමට, පාසල් දරුවන්ගේ අධ්‍යාපන වියදම් අඩු කිරීමට හෝ ගෘහස්ථ ආර්ථිකය ශක්තිමත් කිරීමට කිසිදු සාර්ථක වැඩපිළිවෙළක් ආණ්ඩුව ක්‍රියාත්මක කර නැති බවටද ඔහු වැඩිදුරටත් චෝදනා කළේය.
