ඇමරිකා එක්සත් ජනපදයේ ගුවන් ගමන් පාලන සන්නිවේදන පද්ධතියේ හදිසියේ ඇති වූ බිඳවැටීමක් හේතුවෙන් රට පුරා සියලුම ගුවන් ගමන් අත්හිටුවීමට බලධාරීන් පියවර ගෙන තිබේ. කිසියම් ප්‍රහාරයක් සම්බන්ධයෙන් කිසිදු ඇඟවීමක් නොමැති බවත්, මෙය විදුලි සංදේශ පද්ධතියේ ඇති වූ ගැටලුවක් බවත් ආරක්ෂක ලේකම්වරයා පවසා ඇත.
වසර ගණනාවකට පසු සිදු වූ දෙවන සිදුවීම
2001 වසරේ සැප්තැම්බර් 11 වනදා එල්ල වූ ත්‍රස්ත ප්‍රහාරයෙන් පසු ඇමරිකානු ගුවන් ගමන් පද්ධතියම සම්පූර්ණයෙන්ම අත්හිටවූ දෙවන අවස්ථාව මෙය බව විදෙස් මාධ්‍ය පෙන්වා දෙයි. මේ හේතුවෙන් එරට ප්‍රධාන ගුවන් තොටුපළ රැසකම මගීන් දැඩි අපහසුතාවට පත්ව ඇති බව සඳහන් වේ.
ගුවන් වාර දහස් ගණනක් අවලංගුයි
FlightAware ගුවන්ගමන් නිරීක්ෂණ සේවාවේ දත්තවලට අනුව, මෙම සන්නිවේදන දෝෂය නිසා ගුවන් වාර 7,000කට ආසන්න ප්‍රමාණයක් ප්‍රමාද වී හෝ සම්පූර්ණයෙන්ම අවලංගු වී ඇත. පනවා ඇති මෙම නියෝගය ඉවත් කරන දිනයක් ගැන ෆෙඩරල් ගුවන් සේවා පාලන අධිකාරිය මෙතෙක් නිශ්චිත තොරතුරක් අනාවරණය කර නොමැති වුවත්, ඇතැම් ප්‍රදේශවල සන්නිවේදන පද්ධති ක්‍රමයෙන් යථා තත්ත්වයට පත්වෙමින් පවතින බව වාර්තා වේ.
