ශ්‍රී ලාංකික පරිශීලකයන් විසින් පළ කරන ලද ටික් ටොක් වීඩියෝ විශාල ප්‍රමාණයක් වේදිකාවෙන් ඉවත් කිරීමට එම ආයතනය පියවර ගෙන තිබේ. 2026 වසරේ දෙවන කාර්තුව හෙවත් අප්‍රේල් සිට ජූනි දක්වා කාලය තුළ මෙරටින් පළ වූ වීඩියෝ 430,357ක් මෙසේ මකා දමා ඇත්තේ ප්‍රජා මාර්ගෝපදේශ කඩකිරීම හේතුවෙන් බව ඔවුන්ගේ නවතම වාර්තාවේ දැක්වේ.
මෙම ක්‍රියාවලිය සඳහා ස්වයංක්‍රීය තාක්ෂණය බෙහෙවින් උපයෝගී කරගෙන ඇත. ලංකාවෙන් ඉවත් කළ වීඩියෝ අතරින් සියයට 99.4ක්ම කිසිදු පරිශීලකයෙකු පැමිණිලි කිරීමටත් පෙර හඳුනාගෙන ඇති අතර, සියයට 93.9ක්ම පළ කර පැය 24ක් ගතවීමටත් මත්තෙන් මකා දමා තිබේ. කෙසේ වෙතත්, නැවත පරීක්ෂා කිරීමෙන් පසු මෙරට වීඩියෝ 13,000කට ආසන්න ප්‍රමාණයක් නැවත සක්‍රීය කිරීමටද පියවර ගෙන ඇති බව වාර්තා වේ.
ලෝකය පුරාම දැඩි පාලනයක්
ලෝක මට්ටමින් ගත් කල අදාළ කාර්තුවේදී ටික් ටොක් වීඩියෝ මිලියන 188.3ක් ඉවත් කර ඇති අතර, ඉන් මිලියන 183.3ක් හෙවත් සියයට 97.4ක්ම හසු වී ඇත්තේ ස්වයංක්‍රීය අනාවරක මඟිනි. මෙය මුළු අන්තර්ගතයෙන් සියයට 0.5ක් වන අතර, පසුව කළ සමාලෝචනවලින් ගෝලීයව වීඩියෝ මිලියන 6.3ක් යළි පිහිටුවා ඇත.
ගෝලීයව වැඩිපුරම වීඩියෝ ඉවත් කර ඇත්තේ සංවේදී හෝ වැඩිහිටි තේමාවන් නිසා වන අතර එය සියයට 19.5කි. නිරුවත සහ ලිංගික හැසිරීම් හේතුවෙන් සියයට 13.8ක්ද, ආරක්ෂාව සහ සිවිල් සම්මතයන් කඩකිරීම නිසා සියයට 13.7ක්ද, අනතුරුදායක ක්‍රියාකාරකම් නිසා සියයට 13.5ක්ද වශයෙන් ඉවත් කර තිබේ. මීට අමතරව කෘත්‍රිම බුද්ධිය (AI) මඟින් සකසන ලද අන්තර්ගතයන්ද සියයට 1.8ක් අයින් කර ඇත.
ගිණුම් සහ අදහස් දැක්වීම්ද ඉවතට
වීඩියෝවලට අමතරව ගෝලීය වශයෙන් අදහස් දැක්වීම් මිලියන 278.4ක් ඉවත් කර ඇති අතර එය පෙර කාර්තුවේ පැවති මිලියන 237.5ට සාපේක්ෂව සියයට 17.2ක වර්ධනයකි. ව්‍යාජ ගිණුම් මිලියන 146.8ක් සහ අවුරුදු 13ට අඩු යැයි සැක කෙරෙන ගිණුම් මිලියන 26.8ක්ද ලොව පුරා ඉවත් කර තිබේ.
කෙසේ වෙතත්, මෙලෙස ගිණුම් සහ අදහස් දැක්වීම් ඉවත් කිරීමට අදාළ ශ්‍රී ලාංකික දත්ත සමාගම විසින් මෙතෙක් හෙළි කර නැති බව සඳහන් වේ. එමෙන්ම පෙර කාර්තුව හා සංසන්දනය කර නොමැති බැවින් ශ්‍රී ලංකාව තුළ මෙවැනි උල්ලංඝනයන් සැබැවින්ම වැඩි වී ඇත්දැයි නිශ්චිතව කිව නොහැක.
