මෙල්බර්න්හි ආහාර බෙදාහරින්නන්ට පිහි ප්‍රහාරයක්

ඔස්ට්‍රේලියාවේ මෙල්බර්න් නගර මධ්‍යයේ (CBD) ආහාර බෙදාහැරීමේ නිරතව සිටි සේවකයන් දෙදෙනෙකු ඉලක්ක කරගනිමින් සිකුරාදා රාත්‍රියේ මෙම කෲර පිහි ප්‍රහාරය එල්ල වී තිබේ. සිද්ධියත් සමඟ වික්ටෝරියා ප්‍රාන්ත පොලිසියේ මිනීමැරුම් විමර්ශන අංශය (Homicide Squad) පරීක්ෂණ ආරම්භ කළ අතර සැකපිට එක් අයෙකු දැනටමත් අත්අඩංගුවට ගෙන ඇත.

සිද්ධිය වූ හැටි

සිකුරාදා රාත්‍රී 8.10 ට පමණ ක්වීන් වික්ටෝරියා වෙළෙඳපොළ (Queen Victoria Market) ආසන්නයේ ෆ්‍රෙඩ්රික් වේ (Frederick Way) ප්‍රදේශයෙන් පිහි ඇනුමක් වාර්තා වීමත් සමඟ හදිසි ගලවාගැනීමේ අංශ එම ස්ථානයට පැමිණ තිබේ. බරපතළ කැපුම් තුවාල ලබා සිටි සේවකයාට කෘත්‍රිම ශ්වසන ප්‍රතිකාරය (CPR) ලබා දුන්නද ජීවිතය බේරාගැනීමට නොහැකි වූ බවත්, ඔහුගේ අනන්‍යතාව මෙතෙක් තහවුරු කර නොමැති බවත් වාර්තා වේ.

ඉන් සුළු වේලාවකට පසු, නුදුරු ස්ථානයක සිටි 34 හැවිරිදි අනෙක් ආහාර බෙදාහැරීමේ සේවකයාද පිහි තුවාල සහිතව සොයාගෙන රෝහල්ගත කර ඇත. ඔහුගේ තුවාල ජීවිතයට තර්ජනයක් නොවන බව සඳහන් වේ.

පොලිස් පරීක්ෂණ සහ අත්අඩංගුවට ගැනීම

තම පාපැදිවලට කිසියම් අයෙකු අතපෙවීමක් හෝ හානි කිරීමට තැත් කිරීම දැක ඒ ගැන විමසීමට ගිය අවස්ථාවේදී මෙම ගැටුම හටගන්නට ඇති බවට පොලිසිය සැක පළ කරයි. සාක්ෂි එක්රැස් කිරීම සඳහා ක්වීන් වීදිය (Queen Street) සහ ඒබෙකට් වීදිය (A'Beckett Street) අතර ප්‍රදේශය අපරාධ ස්ථානයක් ලෙස නම් කර විමර්ශන කෙරිණි.

පළාගොස් සිටි 51 හැවිරිදි සැකකරුවෙකු ෆුට්ස්ක්‍රේ (Footscray) ප්‍රදේශයේදී අත්අඩංගුවට ගෙන ඇති අතර, සිද්ධිය සම්බන්ධයෙන් වෙනත් කිසිදු පුද්ගලයෙකු සොයමින් නොසිටින බව පොලිසිය තහවුරු කර තිබේ.