යුක්රේන පාලනය යටතේ පවතින නැගෙනහිර ඩොන්බාස් කලාපයෙන් හමුදා ඉවත් කර ගැනීමට එකඟ වන්නේ නම්, එරටට නේටෝ සාමාජිකත්වය ලබා ගැනීමට එක්සත් ජනපදය මැදිහත්වීමට සූදානම් බවට යෝජනාවක් ඉදිරිපත් වී තිබේ. යුක්රේන ජනාධිපති වොලොඩිමියර් සෙලෙන්ස්කි මේ බව අනාවරණය කළේය.
ඇමරිකානු තානාපතිවරුන් වන ජැරඩ් කුෂ්නර් සහ ස්ටීව් විට්කොෆ් පසුගියදා රුසියානු ජනාධිපති පුටින් මෙන්ම යුක්රේන ජනාධිපති සෙලෙන්ස්කි හමුවී සාකච්ඡා පවත්වා ඇති අතර, එම හමුවෙන් අනතුරුව සෙලෙන්ස්කි මෙම තොරතුරු ප්රකාශ කර තිබේ.
සෙලෙන්ස්කිගේ කොන්දේසි සහ ඩොන්බාස්හි වටිනාකම
යුක්රේනය ඩොන්බාස් කලාපය කිසිසේත් අත්හැරීමට සූදානම් නැති බව සෙලෙන්ස්කි නැවත නැවතත් පෙන්වා දෙයි. එසේ වුවත්, රටට අවශ්ය ආරක්ෂක සහතික, හමුදා සීමාවන් සහ විනාශ වූ රට නැවත ගොඩනැගීමට අරමුදල් ලබා දෙන්නේ නම්, එම තීරණය ජනමත විචාරණයකට ඉදිරිපත් කිරීමට සූදානම් බව ඔහු සඳහන් කර ඇත.
ඛණිජ සම්පත් බහුල සරුසාර ප්රදේශයක් වන ඩොන්බාස් අල්ලා ගැනීමට රුසියාව යුද්ධයේ ආරම්භයේ සිටම දැඩි උත්සාහයක යෙදේ. මේ වන විට යුක්රේන භූමියෙන් පහෙන් එකක් පමණ රුසියාව සතු පාලනයේ පවතින අතර, යුක්රේනයේ හමුදා බලය සීමා කිරීම, භූමිය පැවරීම සහ නේටෝවට නොබැඳීම ඔවුන්ගේ කොන්දේසි අතර වේ.
හිටපු තානාපතිවරයා පවසන කතාව
මේ අතර, යුක්රේනයේ හිටපු එක්සත් ජනපද තානාපති විලියම් ටේලර් සීඑන්එන් හි ජෙසිකා ඩීන් හමුවේ අදහස් දක්වමින් පවසා ඇත්තේ අවසානයේ නේටෝවට ඇතුළු වීම යුක්රේනයට සටන් විරාමයක් පිළිගැනීමට අවශ්ය ආරක්ෂක සහතිකය විය හැකි බවයි.
කෙසේ වෙතත්, මෙවැනි යෝජනාවක් වොෂින්ටනය විසින් පමණක් සිදු නොකළ යුතු බව ඔහු පෙන්වා දෙයි. නේටෝ සංවිධානයට නව සාමාජිකයෙකු ඇතුළත් කර ගැනීමට නම් එහි සිටින සෙසු සියලුම සාමාජික රටවල ඒකමතික කැමැත්ත හිමිවිය යුතු බව ඔහු වැඩිදුරටත් කියා සිටී.






