ලොව දැවැන්ත තාක්ෂණික සමාගමක් වන Nvidia හි ප්‍රධාන විධායක නිලධාරී Jensen Huang සහ චීන ඔත්තුකාරියක යැයි සැක කෙරෙන කාන්තාවක් අතර පැවති සබඳතාවක් පිළිබඳ තොරතුරු වාර්තා වීමත් සමඟ සමාගම තුළ ස්වාධීන විමර්ශනයක් අරඹා ඇති බව වාර්තා වේ.
සිදුවූ වරද පිළිගනිමින් Jensen Huang තම බිරිඳගෙන් සහ දරුවන්ගෙන් සමාව ඉල්ලා ඇත. තමා කළ දෙය පිළිබඳ සම්පූර්ණ වගකීම භාරගන්නා බවත්, සේවකයින් සහ කොටස් හිමියන් වෙනුවෙන් තමාගෙන් ඉටුවිය යුතු අපේක්ෂිත මට්ටම කරා ළඟා වීමට නොහැකි වූ බවත් ඔහු සඳහන් කර තිබේ.
කවුද මේ චීන කාන්තාව?
විදෙස් මාධ්‍ය වාර්තා කරන්නේ Jensen Huang සමඟ සමීප සබඳතාවක් පැවැත්වූ ඇලිස් හුආං (Alice Huang) නමැති චීන ජාතික ව්‍යාපාරික කාන්තාව බීජිං රජය වෙනුවෙන් ඔත්තු බලන්නියක බවට එක්සත් ජනපද බුද්ධි අංශ නිලධාරීන් සැක කරන බවයි.
කෙසේ වෙතත්, සමාගමේ රහස් හෝ ජාතික ආරක්ෂාව අනතුරට ලක්ව ඇති බවට කිසිදු සාක්ෂියක් නැති බවත්, ප්‍රධාන විධායක නිලධාරියා සමාගම ඉදිරියට ගෙන යාමට කැපවී සිටින බවත් Nvidia පවසයි.
“ඔහු දක්ෂයෙකු බව මම දන්නවා, නමුත් සිදුවන්නේ කුමක්දැයි අපට කිසිදා කිව නොහැකියි”ඩොනල්ඩ් ට්‍රම්ප්
ට්‍රම්ප් කියන කතාව
වසර 30කට වැඩි කාලයක් තිස්සේ Jensen Huang විසින් මෙහෙයවනු ලබන Nvidia සමාගම, කෘත්‍රිම බුද්ධි (AI) තාක්ෂණයේ ප්‍රධානතම දෘඩාංග සපයන්නා වේ. ජාතික ආරක්ෂාව පිළිබඳ ගැටලු මත අධ්‍යක්ෂ මණ්ඩලය විසින් අරඹා ඇති මෙම පරීක්ෂණයට තමා පූර්ණ සහය දෙන බව Jensen Huang වැඩිදුරටත් සඳහන් කර ඇත.
මේ පිළිබඳව අදහස් දක්වමින් අමෙරිකානු ජනාධිපති ඩොනල්ඩ් ට්‍රම්ප් පවසා ඇත්තේ, මෙම විමර්ශනය ආරම්භ වීමෙන් පසු තමා Nvidia ප්‍රධානියා සමඟ කතා නොකළ බවයි.
