2026 වසරේ අවසන් කාර්තුව සඳහා විදුලි ගාස්තු සංශෝධනයක් නොකරන බව මහජන උපයෝගිතා කොමිෂන් සභාව පවසයි. ඒ අනුව තෙවන කාර්තුවේදී පැවති විදුලි ගාස්තු ක්‍රමයම ඉදිරියටත් ක්‍රියාත්මක වීමට නියමිත බව වාර්තා වේ.

පිරිවැය දත්ත සහ තීරණය

ජාතික පද්ධති ක්‍රියාකරු (NSO) ඉදිරිපත් කළ තොරතුරුවලට අනුව, 2026 අවසන් කාර්තුවේ විදුලිය සැපයීමේ පිරිවැය සියයට 2.88කින් ඉහළ යනු ඇති බවට කොමිෂන් සභාව මීට පෙර නිරීක්ෂණය කර තිබිණි.

නමුත් නොවැම්බර් 9 වැනිදා යාවත්කාලීන කළ පිරිවැය දත්ත මෙන්ම මහජන උපදේශනයේදී ලැබුණු අදහස් හා යෝජනා පරීක්ෂා කිරීමෙන් පසු ගාස්තු වෙනසක් අවශ්‍ය නොවන බවට නිගමනය කර ඇත.

දත්ත ලැබීමේ ප්‍රමාදය

අදාළ පිරිවැය දත්ත NSO විසින් අගෝස්තු 17 වැනිදාට පෙර ලබා දිය යුතුව තිබුණත්, ඒවා කොමිෂන් සභාව වෙත භාර දී ඇත්තේ ඔක්තෝබර් 6 වැනිදා බව ද එම නිවේදනයේ වැඩිදුරටත් සඳහන් වේ.