ශ්‍රී ලංකාවට මෙම වසරේ පැමිණ ඇති විදෙස් සංචාරකයින් ගණන ලක්ෂ 19 ඉක්මවා ගොස් තිබේ. ශ්‍රී ලංකා සංචාරක සංවර්ධන අධිකාරිය විසින් නිකුත් කර ඇති නවතම දත්ත වාර්තාවල මේ බව පැහැදිලිව දැක්වේ.
එම දත්තයන්ට අනුව ජනවාරි 1 වැනිදා සිට නොවැම්බර් 08 වැනිදා දක්වා කාලය තුළ මෙරටට පැමිණ ඇති මුළු සංචාරකයින් සංඛ්‍යාව 1,912,233ක් බව වාර්තා වේ. එමෙන්ම නොවැම්බර් 1 වැනිදා සිට 08 වැනිදා දක්වා වූ කෙටි කාලය තුළදී පමණක් සංචාරකයින් 49,929 දෙනෙකු මෙරටට පැමිණ ඇත.
වැඩිම පිරිසක් ඉන්දියාවෙන්
2026 වසරේ මේ දක්වා කාලය තුළ මෙරටට වැඩිම සංචාරකයින් ප්‍රමාණයක් පැමිණි රට බවට පත්ව ඇත්තේ ඉන්දියාවයි. එරටින් පමණක් සංචාරකයින් 512,026 දෙනෙකු පැමිණ ඇති බව සඳහන් වේ.
මීට අමතරව එක්සත් රාජධානියෙන් සංචාරකයින් 176,670ක්ද, චීනයෙන් 126,326ක් සහ ජර්මනියෙන් 108,754 දෙනෙකුද මෙරටට පැමිණ ඇති බව සංචාරක සංවර්ධන අධිකාරියේ දත්ත වාර්තා පෙන්වා දෙයි.
