කැබිනට් තීරණ දැනුම්දීමේ මාධ්‍ය හමුවේදී අදහස් දැක්වූ අමාත්‍ය වෛද්‍ය නලින්ද ජයතිස්ස මහතා සඳහන් කළේ, අදාළ සංවර්ධන සැලැස්ම ගැන යමෙකුට සැකයක් ඇත්නම් ඒ සම්බන්ධයෙන් පත්කර ඇති උපදේශක සභාවේ සභාපතිත්වය දරන වැඩබලන අටමස්ථානාධිපති හිමිපාණන්ගෙන් කරුණු පැහැදිලි කරගත හැකි බවයි.
අනුරාධපුර අටමස්ථානාධිපති ධූරයේ වැඩ ආවරණය කරන රුවන්වැලි සෑ වෛත්‍යාරාමාධිකාරී ඊතලවැටුණුවැවේ ඥානතිලක හිමියන් සත්‍යග්‍රහය පවත්වන තැනට මීටර කිහිපයක් දුරින් වැඩසිටින බව අමාත්‍යවරයා පෙන්වා දුන්නේය. උන්වහන්සේ මුණගැසී ගැටලුව විසඳා නොගෙන සමාජ මාධ්‍ය සහ නාලිකා සම්බන්ධ කරගනිමින් මේ කරන ක්‍රියාව ගැන ඇමතිවරයා උපහාසයෙන් අදහස් දැක්වීය.
32 දෙනෙකුගේ උපදේශක සභාව සහ නෛතික පියවර
පූජා භූමි සංවර්ධන වැඩසටහන සම්බන්ධ තීරණ ගැනීමට සාමාජිකයින් 32 දෙනෙකුගෙන් යුත් ජනාධිපති උපදේශක සභාවක් පත්කර ඇති බව අමාත්‍යවරයා පැවසීය. එහි සභාපතිත්වය දරන්නේ අතිපූජ්‍ය ඊතලවැටුණු වැවේ ඥානතිලක නායක හිමියන් සහ ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති මහතාය.
මේ අතර, රථ ගාලේ රැඳී සිටිමින් කරන මෙම විරෝධතාව සම්බන්ධයෙන් අනුරාධපුර මූලස්ථාන පොලිස් අධිකාරීවරයා නව 'බී' වාර්තාවක් අධිකරණයට ඉදිරිපත් කර ඇති අතර, සිද්ධියට සම්බන්ධ පුද්ගලයින් පස් දෙනෙකුට නොවැම්බර් 20 වනදා අධිකරණය හමුවේ පෙනී සිටින ලෙස නියෝග ලැබී තිබේ.
අවසර ගත් කතාව සහ මත්ද්‍රව්‍ය චෝදනාව
මෙම සිදුවීමට අදාළව අත්අඩංගුවට ගත් එක් අයෙකු හෙරොයින් සහ ගංජා පානය කර සිටි බව වෛද්‍ය වාර්තා මගින් තහවුරු වී ඇති බවද ඇමතිවරයා හෙළි කළේය.
එමෙන්ම රුවන්වැලි සෑයේ නායක හිමියන්ගෙන් විරෝධතාවට අවසර ගත් බවට පළවන ප්‍රකාශ අසත්‍ය බවද හෙළිව ඇත. පාන්දර පහට ලබා දුන් කිරිපිඬු දානයට පමණක් තමන් ආශිර්වාද කළ බවත්, ඉන් පසු රථගාලේ පත්‍රිකා බෙදමින් කරන විරෝධතාවලට තම සම්බන්ධයක් නැති බවත් උන්වහන්සේ ප්‍රකාශ කර තිබේ.
ඊළඟට කුමක්ද?
අදාළ සිදුවීමට සම්බන්ධ පුද්ගලයින් පස් දෙනෙකු එළඹෙන නොවැම්බර් 20 වනදා අධිකරණය හමුවේ පෙනී සිටීමට නියමිතය.
